Fyrsti leikur dagsins á HM hefst klukkan 10 en Japan og Kosta Ríka eigast við á Ahmad bin Ali leikvanginum klukkan 10. Liðin leika í E-riðli ásamt Spáni og Þýskalandi sem mætast í kvöld.

Japan vann frækinn sigur á Þýskalandi í fyrstu umferð en fimm breytingar eru á byrjunarliði liðsins frá þeim leik. Takehiro Tomiyasu, leikmaður Arsenal, byrjar aftur á bekknum. Ef Japan vinnur er liðið á barmi þess að tryggja sér sæti í 16-liða úrslitum.

Kosta Ríka gerir tvær breytingar en liðið var niðurlægt af Spáni í fyrstu umferð. Kendall Waston kemur inn í hægri bakvörðinn í stað Carlos Martinez og Gerson Torres er á vinstri vængnum í stað Jewison Bennette.

Enski úrvalsdeildardómarinn Michael Oliver dæmir leikinn.