Svíar voru ekki sáttir með hegðun þýska landsliðsins eftir leik þjóðanna á HM þar sem Toni Kroos skoraði mark úr aukaspyrnu í lok leiks. Ekki bætti úr skák að tveir starfsmenn þýska liðsins löbbuðu að bekk andstæðinganna og klöppuðu í andlitið á þeim eftir leik.

„Nokkrir af leiðtogum þeirra fögnuðu með því að hlaupa í áttina að okkur og gera grín að okkur. Það fór verulega í taugarnar á okkur og gerði okkur reiða. Við börðumst í 90 mínútur og eftir leik eiga allir að takast í hendur,” sagði Janne Andersson, þjálfari Svía.

Mikael Lustig, varnarmaður Svía og Celtic sagði við Aftonbladet að hann hefði verið hissa á hegðun leikmanna andstæðinganna eftir leik.

„Það er ekkert að því að slá Þýskaland út í ljósi hegðunar þeirra og sérstaklega vegna þess sem nokkrir leikmenn sögðu. Þetta er gott, ég ætla ekki að neita því," sagði Lustig.

„Ég ætla ekki að nefna þá en það voru tveir leikmenn sem hlupu framhjá mér og öskruðu í andlitið á mér. Þeir gerðu grín að mér. Ég sagði ekkert tilbaka því ég var svo hissa.”

Svíþjóð mætir Sviss á þriðjudaginn í 16-liða úrslitum heimsmeistaramótsins. Þýskaland fer hinsvegar heim og tókst ekki að breyta þeirri hefð sem hefur myndast að núverandi heimsmeistarar detti út í riðlakeppninni.