„Ég er ekkert eðlilega ánægður," sagði Þórsarinn Bjarki Þór Viðarsson eftir 2 - 3 útisigur á Leikni F í Lengjudeildinni í dag en leikið var í Fjarðabyggðarhöllinni.
Lestu um leikinn: Leiknir F. 2 - 3 Þór
„Vá hvað þetta var erfiður leikur. Við erum mikið fyrir að búa til dramatík í lokin," bætti hann við.
„Við vorum ekki klárir fyrstu mínúturnar og þeir skora eftir mínútu. En það kom okkur í gírinn og við náðum að setja tvö eftir horn," bætti Bjarki við en hann skoraði sjálfur mörk á 8. og 11. mínútu og kom Þór yfir.
Bjarki byrjaði í miðvarðarstöðunni í dag en spilar vanalega sem bakvörður. „Þetta byrjaði í Kjarnafæðismótinu þar sem allir miðverðirnir okkar voru meiddir og ég þurfti að leysa þessa stöðu. Ég var nokkuð góður í henni og það hefur enginn náð að henda mér út úr stöðunni ennþá. Mér finnst skemmtilegra í miðverði, minni hlaup og meiri barátta. Ég er fínn í báðu."
Nánar er rætt við hann í sjónvarpinu að ofan en hann segir í lokin að tveir leikmenn Þórs hafi ekki spilað leikinn útaf óvissu með smithættu eftir að leikmaður Stjörnunnar greindist með Covid-19 í vikunni en Leiknir mætti Stjörnunni í bikarleik í vikunni.
Athugasemdir