HK fær það verðuga verkefni að taka á móti Val í Pepsi Max-deildinni í Kórnum í kvöld klukkan 19:15. Bæði þessi lið töpuðu í fyrstu umferðinni og en unnu síðan bæði 3-0 sigur í 2. umferðinni og mæta því með sjálfstraust inn í leikinn í kvöld.

Brynjar Björn Gunnarsson neyðist til að gera breytingar á byrjunarliði sínum frá því í leiknum gegn KR í síðustu umferð. Valgeir Valgeirsson sem hefur farið á kostum í upphafi móts er meiddur á öxl og þá er Jón Arnar Barðdal í sóttkví en frammistaða hans í Frostaskjólinu í síðustu umferð vakti mikla athygli.

Stefan Alexander Ljubicic og Atli Arnarson koma inní byrjunarlið HK-inga.

Heimir Guðjónsson gerir eina breytingu á sínu byrjunarliði frá sigrinum gegn Gróttu. Bakvörðurinn Valgeir Lunddal Friðriksson kemur inn fyrir Færeyinginn, Magnus Egilsson. Þá vekur athygli að Torfi Geir Halldórsson er varamarkvörður Vals í kvöld í stað Sveins Sigurðar. Torfi Geir er sonur Halldórs Jóhanns Sigfússonar, handknattleiksþjálfara Selfyssinga.

Smelltu hér til að fara í beina textalýsingu.