„Frábær leikur. Harka í leiknum, mikið um stöðubaráttur og skyndisóknir hjá báðum liðum. Já, við komum til baka í enn eitt skiptið eftir að hafa fengið á okkur mark og ég er mjög ánægður með það. Virkilega góður karakter og svo var heppnin með okkur í vítinu,'' sagði Andri Hjörvar Albertsson eftir 2-1 sigur Þór/KA á KR í Pepsi-Max deild kvenna í kvöld.
Lestu um leikinn: Þór/KA 2 - 1 KR
Arna Sif Ásgrímsdóttir skoraði sigurmark leiksins úr vítaspyrnu en hún átti upprunalega ekki að taka spyrnuna. Þegar Margrét Árnadóttir var að gera sig klára í að taka vítaspyrnuna sem hún fiskaði þá vísaði Sveinn Arnarsson, dómari leiksins, henni útaf og sýndi henni gula spjaldið. Hvað gerðist þar?
„Ég held að hún hafi verið með einhverja skartgripi sem hún má ekki bera á sér í leik og reglunum samkvæmt þá á hún bara að fjarlægja það og ég held að þetta hafi verið allt saman rétt. Það steig bara einhver önnur á punktinn og kláraði það.''
Margrét Árnadóttir kom inn af bekknum og jafnaði leikinn með sinni fyrstu snertingu og fiskar svo víti. Andri var afar ánægður með hennar framlag.
„Þetta er frábær stelpa, hún leggur sig alltaf 100% fram og hún átti frábæra innkomu. Mark í fyrstu snertingu og svo fiskar hún víti. Hrikalega ánægður fyrir hennar hönd,'' sagði Andri.
Viðtalið má sjá í heild sinni í spilaranum hér að ofan.
Athugasemdir