Samúel Kári Friðjónsson átti mjög góðan leik fyrir Viking er liðið lagði Start að velli í Íslendingaslag í norsku úrvalsdeildinni.
Samúel Kári kom Viking í 2-0 eftir rúmlega klukkutíma leik og átti hann stóran þátt í þriðja marki liðsins nokkrum mínútum síðar. Leikurinn endaði með 4-1 sigri Viking. Axel Óskar Andrésson spilaði allan leikinn fyrir Viking og átti mjög góðan leik.
Viking er í sjöunda sæti deildarinnar með 39 stig úr 26 leikjum. Start er í 13. sæti, einu stigi frá fallsvæðinu. Jóhannes Þór Harðarson er þjálfari Start og Guðmundur Andri Tryggvason er á mála hjá félaginu. Hann var ekki í hóp í dag.
Jón Guðni Fjóluson spilaði þá klukkutíma þegar Brann vann 3-1 sigur á Álasundi í öðrum Íslendingaslag. Davíð Kristján Ólafsson spilaði allan leikinn fyrir Álasund sem er á botni deildarinnar. Liðið er svo gott sem fallið. Brann er í tíunda sæti.
Í norsku 1. deildinni var Adam Örn Arnarson ekki í hóp hjá Tromsö sem vann 1-0 sigur á Ranheim. Tromsö er búið að vinna sér þáttökurétt í norsku úrvalsdeildinni fyrir næsta tímabil.
Mikael byrjaði í jafntefli
Mikael Neville Anderson var í byrjunarliði Midtjylland er liðið gerði markalaust jafntefli við Álaborg í dönsku úrvalsdeildinni.
Mikael spilaði stórt hlutverk þegar Midtjylland varð meistari á síðustu leiktíð. Hann hefur ekki spilað eins stórt hlutverk á þessu tímabili. Hann var að byrja sinn þriðja deildarleik á tímabilinu og spilaði hann allan leikinn fyrir Midtjylland, sem er á toppi dönsku deildarinnar.
Böðvar spilaði tapi í Póllandi
Vinstri bakvörðurinn Böðvar Böðvarsson lék allan leikinn fyrir Jagiellonia Bialystok þegar liðið tapaði fyrir Stal Mielec á útivelli, 3-1, í pólsku úrvalsdeildinni.
Samkvæmt uppstillingu Soccerway lék Böðvar vinstra megin í hjarta varnarinnar. Hann er að upplagi vinstri bakvörður.
Jagiellonia er í áttunda sæti pólsku úrvalsdeildarinnar með 14 stig eftir 11 leiki.
Ögmundur og Birkir á bekknum
Landsliðsmarkvörðurinn Ögmundur Kristinsson sat á bekknum hjá Olympiakos er liðið vann 1-2 útisigur á Aris í toppslag í grísku úrvalsdeildinni. Olympiakos er á toppi deildarinnar með 22 stig.
Birkir Valur Jónsson var þá ónotaður varamaður hjá Spartak Trnava í úrvalsdeildinni í Slóvakíu. Liðið tapaði 2-0 fyrir DAC, sem er á toppi deildarinnar. Trnava situr í sjötta sæti, en Birkir hefur komið við sögu í þremur leikjum á tímabilinu þegar 15 leikir eru búnir.
Athugasemdir