Bæði þessi lið byrjuðu á sigri í fyrstu umferð; Brasilía gegn Serbíu og Sviss gegn Kamerún.

Brasilía varð fyrir áfalli í fyrsta leik þar sem þeirra helsta stórstjarna, Neymar, fór meiddur af velli. Hægri bakvörðurinn Danilo fór einnig meiddur af velli og kemur ekki meira við sögu í riðlakeppninni.

Eder Militao og Fred koma inn hjá brasilíska liðinu fyrir þá sem meiddir eru.

Það er stór breyting hjá Sviss þar sem Xherdan Shaqiri byrjar ekki. Fabian Rieder, leikmaður Young Boys, kemur inn fyrir hann. Shaqiri byrjar á bekknum sem er athyglisvert; hann hlýtur að vera að glíma við meiðsli.

Byrjunarlið Brasilíu: Alisson; Militao, Marquinhos, Silva, Sandro; Casemiro, Fred, Paqueta; Raphinha, Vinicius, Richarlison.

Byrjunarlið Sviss: Sommer; Widmer, Akanji, Elvedi, Rodriguez; Freuler, Xhaka; Vargas, Sow, Rieder; Embolo.