Óvenjulegt atvik átti sér stað í 2-1 sigri Þórs/KA og KR í Pepsi Max-deild kvenna í gærkvöldi. Margrét Árnadóttir, framherji Þórs/KA, kom inn á sem varamaður á 55. mínútu og jafnaði mínútu síðar.
Á 75. mínútu fékk Margrét vítaspyrnu og hún ætlaði að taka spyrnuna sjálf. Sveinn Arnarsson, dómari leiksins, sýndi Margréti hins vegar gula spjaldið þar sem hann sá að hún var með eyrnalokka inni á vellinum.
Bannað er að vera með eyrnalokka og aðra skargripi í leikjum en Margrét fékk gula spjaldið og var send af velli til að taka eyrnalokkana úr.
Arna Sif Ásgrímsdóttir fór því í staðinn á vítapunktinn og hún skoraði sigurmarkið í leiknum.
„Aðstoðardómarinn vildi fá að skoða mig rétt áður en ég fór inn á, eins og lög gera ráð fyrir, en sú skoðun var greinilega ekki mjög góð skoðun. Mér er alveg sama fyrst Arna Sif skoraði. Ég hefði grenjað mig í svefn næstu þrjár nætur ef hún hefði klúðrað vítinu út af ruglinu í mér,“ sagði Margrét í viðtali við mbl.is eftir leik.
Hér að neðan má sjá atvikið af vef Vísis.
Athugasemdir