Stærstu félög Evrópu höfðu áhuga á De Ligt en hann valdi á endanum að fara til Ítalíumeistara Juventus, þar sem hann gat lært af miðvörðunum goðsagnakenndu Giorgio Chiellini og Leonardo Bonucci.

Chiellini var þó frá vegna meiðsla stærsta hluta tímabils og virtist De Ligt eiga erfitt uppdráttar á fyrri hluta tímabils. Hann missti byrjunarliðssæti sitt í kringum áramótin en vann það aftur til baka og hefur reynst gríðarlega mikilvægur á lokahnykknum, þar sem Juve tryggði sinn níunda Ítalíumeistaratitil í röð á dögunum.

„Mér finnst hann ekki vera búinn að bæta sig frá því að hann var hjá Ajax í fyrra. Hann er búinn að vera óheppinn með meiðslin hjá Chiellini sem er alvöru liðsmaður," sagði van Basten.

„Bonucci hugsar aðallega um sjálfan sig, hann skipuleggur ekki vörnina og hjálpar ekki liðsfélögum á sama hátt og Chiellini. De Ligt hefði getað lært mikið af Chiellini.

„De Ligt hefði lært meira hjá Real Madrid, Barcelona eða Manchester City. Hann hefði spilað í deildum með meiri samkeppni því Serie A er ekki jafn góð deild og Premier League eða La Liga."