Fiorentina virðist vera að koma sér á skrið eftir slaka byrjun á tímabilinu en liðið vann AC Milan 3-1 á San Siro í kvöld.

Sílemaðurinn Erick Pulgar kom Fiorentina yfir með marki úr vítaspyrnu á 14. mínútu en það var franski reynsluboltinn Franck Ribery sem keyrði sig í gegnum vörn Milan og skaut á markið. Boltinn barst til Federico Chiesa sem var tekinn niður í teignum.

Gaetano Castrovilli bætti við öðru á 66. mínútu áður en Chiesa fékk fullkomið tækifæri til að bæta við þriðja markinu en Fiorentina fékk þá vítaspyrnu sem hann klúðraði.

Það kom ekki að sök því átta mínútum síðar lagði Chiesa upp mark fyrir Ribery áður en Rafael Leao minnkaði muninn tveimur mínútum síðar.

Góður sigur Fiorentina og liðið nú með 8 stig í 9. sæti á meðan Milan er í 16. sæti með 6 stig.