Ítalía: Rólegur dagur hjá Alberti - Napoli á toppinn

KR-ingurinn skoraði tvö og var hetja Fiorentina í fyrsta leik sínum með liðinu í síðustu viku.

Hann hafði beðið lengi eftir að þreyta frumraun sína og gat ekki beðið um betri byrjun, en náði ekki alveg að leika það eftir gegn Empoli í dag.

Heimamenn í Empoli áttu hættulegri færi á meðan Fiorentina skapaði sér lítið af viti. Moise Kean átti nokkrar tilraunir, sem voru arfaslakar, en Albert átti fremur rólegan dag.

Fotmob gefur honum 6,3 í einkunn. Þar kemur fram að hann hafi verið með 84% nýtingu í heppnuðum sendingum, átti sex sendingar á síðasta þriðjungi vallarins og snerti boltann tvisvar sinnum í teig mótherjans.

Þó má benda á þá staðreynd að Empoli hefur haldið hreinu í öllum þremur heimaleikjum sínum í deildinni á þessu tímabili, meðal annars gegn Juventus.

Empoli er í 6. sæti deildarinnar með 10 stig en Fiorentina með 7 stig í 11. sæti.

Napoli vann þá Monza, 2-0. Matteo Politano og Khvicha Kvaratskhelia skoruðu mörk Napoli með ellefu mínútna millibili í fyrri hálfleik.

Napoli-menn eru að njóta lífsins undir stjórn Antonio Conte en liðið er á toppnum með 13 stig eftir sex leiki.

Empoli 0 - 0 Fiorentina

Napoli 2 - 0 Monza
1-0 Matteo Politano ('22 )
2-0 Khvicha Kvaratskhelia ('33 )