A-riðli er lokið á HM og það var Holland sem vann riðilinn og Afríkumeistarar Senegal sem fylgja í 16-liða úrslitin.

Holland vann fyrirhafnalítinn 2-0 sigur á Katar þar sem Cody Gakpo skoraði sitt þriðja mark í jafnmörgum leikjum á mótinu. Katar tapaði öllum leikjum sínum sem er versti árangur gestgjafa í sögu HM.

Senegal vann Ekvador í hreinum úrslitaleik um að fylgja Hollendingum áfram. Úr varð sveiflukenndur og skemmtilegur leikur þar sem Kalidou Koulibaly reyndist hetjan með því að skora sigurmarkið, hans fyrsta landsliðsmark.

Þrátt fyrir að vera án Sadio Mane á mótinu tókst Senegal að komast í 16-liða úrslit. Þar verður liðið hinsvegar án miðjumannsins Idrissa Gueye sem fékk gult spjald í dag og tekur út leikbann í næsta leik.

Ekvador vann Katar í opnunarleik mótsins en fjögur stig dugðu liðinu ekki til að komast áfram.

Lokastaðan í A-riðli:
1. Holland 7 stig
2. Senegal 6 stig
3. Ekvador 4. stig
4. Katar 0 stig