Franski miðjumaðurinn N'Golo Kante hefur verið að æfa einn síns liðs frá því að lið máttu æfa aftur í hópum.
Hann vill ekki smitast af kórónuveirunni eftir það sem hann upplifði 2018 þegar bróðir hans fékk hjartaáfall og lést. Sama ár leið yfir Kante á miðri æfingu hjá Chelsea af ástæðulausu. Hann fór í allar mögulegar hjartarannsóknir sem sýndu ekkert athugavert.
Tölfræði frá Bretlandi segir einnig skýrt að fólk sem er dökkt á hörund er tvöfalt líklegra til að látast vegna Covid-19 heldur en hvítt fólk í Englandi og Wales.
Chelsea styður ákvörðun Kante sem er ekki eini úrvalsdeildarleikmaðurinn til að neita að æfa með liðsfélögunum. Troy Deeney, sóknarmaður og fyrirliði Watford, hefur einnig neitað að mæta á æfingar.
Óljóst er hvort Kante muni treysta sér til að spila fótbolta þegar úrvalsdeildartímabilið fer aftur af stað 17. júní.
Athugasemdir