Mbappe átti magnaðan leik og réðu Argentínumenn alls ekki við sprengikraftinn hans og tækni.

Mbappe fiskaði vítaspyrnuna sem kom Frökkum yfir og skoraði svo tvennu í síðari hálfleik. Hann er fyrsti táningurinn til að skora tvennu á Heimsmeistaramótinu síðan Pele gerði það fyrir 60 árum.

„Ég er upp með mér. Það er mikill heiður að vera fyrsti táningurinn til að skora tvennu á þessu sviði síðan Pele gerði það," sagði Mbappe.

„Það þarf samt að setja hlutina í samhengi, Pele var í allt öðrum gæðaflokki. Það er samt alltaf gaman að heyra nafnið sitt í sömu andrá og hans."