Áður fyrr var þetta titilslagurinn á hverri leiktíð en undanfarin ár hafa bæði lið látið sér nægja að berjast um Evrópusæti.

Paul Pogba og Marcus Rashford voru tæpir fyrir leikinn en þeir eru báðir í byrjunarliði Rauðu djöflanna í kvöld. Jesse Lingard og Daniel James fullkomna sóknarlínuna í fjarveru Anthony Martial sem er frá vegna meiðsla.

Ashley Young spilar þá í vinstri bakverði í fjarveru Luke Shaw og kemur Axel Tuanzebe inn í stöðu hægri bakvarðar, á meðan Diogo Dalot og Aaron Wan-Bissaka eru fjarri góðu gamni.

Gestirnir eru án Alexandre Lacazette og Emile Smith Rowe vegna meiðsla. Mesut Özil virðist ekki vera í áformum Unai Emery og er utan hóps rétt eins og skoski bakvörðurinn Kieran Tierney, sem hefur þó verið að glíma við meiðsli á upphafi tímabils. Svipaða sögu er að segja af Hector Bellerin sem er utan hóps.

Hinn ungi Bukayo Saka byrjar í sóknarlínu Arsenal. Hann er 18 ára gamall og hefur byrjað tímabilið vel undir stjórn Emery.

Það eru þrjú stig sem skilja liðin að fyrir leik kvöldsins. Arsenal getur jafnað Leicester á stigum í þriðja sæti með sigri á meðan Man utd getur rifið sig upp úr neðri hluta deildarinnar og jafnað stórliðin á stigum.

Man Utd: De Gea, Tuanzebe, Lindelöf, Maguire, Young, McTominay, Pereira, Pogba, Lingard, James, Rashford.
Varamenn: Romero, Rojo, Williams, Fred, Mata, Matic, Greenwood.

Arsenal: Leno, Chambers, Sokratis, Luiz, Kolasinac, Guendouzi, Xhaka, Torreira, Saka, Pepe, Aubameyang
Varamenn: Martinez, Maitland-Niles, Holding, Willock, Ceballos, Nelson, Martinelli.