Stuðningsmenn Milan hafa reglulega mótmælt slæmu gengi félagsins en þeir gengu fyrr af San Siro í fyrsta sinn á þessari öld er Milan tapaði 1-3 gegn Fiorentina í vikunni.

Þúsundir stuðningsmanna flykktust af pöllunum þegar tíu mínútur voru eftir af venjulegum leiktíma og endurspeglaðist líðan þeirra í frammistöðu leikmanna sem reyndu varla að minnka muninn á lokakaflanum. Þess í stað leyfðu þeir andstæðingunum að senda boltann á milli sín þar til tíminn rann út.

„Þetta er afar sársaukafullt fyrir alla sem elska AC Milan. Við munum ná fyrri hæðum aftur en það mun taka tíma," segir Paolo Maldini, goðsögn hjá Milan sem starfar í stjórn félagsins.

Milan er komið með sex stig úr sex umferðum á upphafi tímabils. Báðir sigrar liðsins komu gegn nýliðum deildarinnar og voru afar tæpir.