England: Watkins skúrkurinn í tapi gegn West Ham

Aston Villa tapaði í kvöld sínum öðrum deildarleik í röð er liðið spilaði við West Ham á London Stadium.

Villa vann Arsenal mjög óvænt 0-3 á útivelli í sjöunda leik sínum en tapaði 1-0 heima gegn Brighton í síðustu umferð.

West Ham er hins vegar á mikilli siglingu og vann sinn þriðja leik í röð og er nú í fjórða sæti deildarinnar, fjórum stigum frá toppnum.

Angelo Ogbonna kom West Ham á lagið í kvöld með skallamarki eftir aðeins tvær mínútur í fyrri hálfleik.

Jack Grealish er einn heitasti leikmaður Villa og jafnaði hann metin á 25. mínútu með skoti sem átti viðkomu í varnarmanni og í netið.

Eftir eina mínútu í seinni hálfleik var West Ham komið aftur yfir er Jarod Bowen afgreiddi fyrirgjöf Said Benrahama með öxlinni og staðan orðin 2-1.

Á 74. mínútu fengu gestirnir hins vegar vítaspyrnu eftir að Declan Rice hafði gerst brotlegur innan teigs. Ollie Watkins steig á punktinn en skot hans fór í þverslá og yfir markið.

Watkins virtist svo hafa jafnað leikinn á 91. mínútu í uppbótartíma en mark hans var tekið af vegna rangstöðu og lokastaðan, 2-1.