Stuðningurinn getur haft sitt að segja á morgun.
Leiktíminn á leik Íslands og Þýskalands á morgun er nokkuð óvenjulegur en flautað verður til leiks klukkan 14:55. Ástæðan er sú að þýska sjónvarpið er með risaútsendingu frá leiknum og fékk að segja sitt um leiktímann.
Uppselt er á leikinn og Freyr Alexandersson, landsliðsþjálfari, hvetur fólk til að mæta snemma og láta sjá sig þegar íslenska liðið hitar upp.
„Ég er sjálfur ekki sérstakur á klukkuna og mæti yfirleitt of seint. Ekki taka mig til fyrirmyndar og mæta á síðustu stundu a leikinn," sagði Freysi léttur í bragði í dag.
„Mætið snemma og leyfið okkur að finna fyrir stuðningnum í upphitun. Það gæti hjálpað. Það undirbýr liðið fyrir leikinn. Það væri gaman að geta leyft þessu að byggjast eðlilega upp ef fólk mætir snemma og leikmenn geta sogið í sig stemninguna."
„Eigum við ekki að henda einu ákalli á þjóðina í viðbót og biðja fólk um að mæta snemma."
Stuðningsmannasvæði opnar fyrir utan Laugardalsvöllinn klukkan 13:00 á laugardaginn og er fólk hvatt til að mæta snemma og njóta dagsins.
Athugasemdir
