Heimild: mbl
Mbl.is ræddi við Hauk Pál Sigurðsson, fyrirliða Íslandsmeistara Vals, í dag en Valsarar hafa fengið mikla gagnrýni fyrir fögnuð sinn í gærkvöldi.
KSÍ ákvað í gær að blása af keppnistímabilið og fær Valur því Íslandsmeistaratitilinn enda með átta stiga forystu á toppi Pepsi Max-deildarinnar.
„Við vorum nýbúnir að klára æfingu þegar við heyrðum af þessu. Við hefðum að sjálfsögðu viljað klára þá leiki sem eftir voru af tímabilinu," sagði Haukur Páll við mbl.
„Ég bjóst satt best að segja ekki við því að þetta yrði blásið af í gær. Ég átti von á því að það yrðu einhverjir fundir og reynt að bíða með að klára mótið eitthvað lengur og það kom manni á óvart. Þetta er sérstakt.
„Við hefðum eflaust þurft að spila eitthvað aðeins inn í desember til að klára mótið en öll lið eru hvort sem er vön að spila æfingaleiki á þeim tíma. Þetta var kannski orðið of flókið mál vegna reglugerðarinnar sem KSÍ setti í júlí."
Haukur Páll telur Val verðskulda titilinn í ár en hann segir tilfinninguna hafa verið skrýtna þegar leikmenn fréttu að þeir væru orðnir Íslandsmeistarar.
„Það er erfitt að bera þessa þrjá titla sem ég hef unnið með félaginu saman. Ég allavega sagt að það er allt annað að verða sigurvegari inni á vellinum en að koma af æfingu og sjá bara á netinu að það sé búið að slaufa mótinu þegar við eigum fjóra leiki eftir."
Haukur var að lokum spurður út í fögnuðinn í gærkvöldi og viðurkenndi að það hafi verið óábyrg hegðun af hálfu leikmanna.
„Þessi fagnaðarlæti voru ekki plönuð eða neitt slíkt. Við ákváðum að hittast aðeins í Fjósinu eftir að við fréttum að mótinu hefði verið slaufað.
„Þetta voru klár mistök, við biðjumst afsökunar á þessari hegðun okkar sem var óábyrg á þessum tímum. Við áttum að vita betur og auðvitað áttum við bíða með fagnaðarlætin."
Athugasemdir