Ítalía: Fiorentina upp í fjórða sætið

Fiorentina vann nauman 1-0 sigur á Genoa í Alberts-slagnum í Seríu A á Ítalíu í kvöld.

Eins og flestum er kunnugt kom landsliðsmaðurinn Albert Guðmundsson til Fiorentina á láni frá Genoa í sumar, en Fiorentina er skylt að kaupa Albert í lok tímabils fyrir 17 milljónir evra, það er að segja ef ákveðnum skilyrðum er mætt.

Albert er að glíma við meiðsli og gat því ekki tekið þátt í leiknum, en liðsfélagar hans gerðu ágætlega án hans.

Dauðafærin voru ekki mörg í leiknum en fyrsta og eina mark leiksins gerði Robin Gosens þegar tuttugu mínútur voru eftir. Boltinn datt fyrir hann í teignum eftir fyrirgjöf frá hægri og náði hann að teygja sig í boltann og koma honum í vinstra hornið.

Tveimur mínútum síðar átti David De Gea góða markvörslu frá Andrea Pinamonti hinum megin á vellinum og síðan aftur á 81. mínútu.

Genoa fann ekki leið fram hjá De Gea í kvöld og urðu lokatölur 1-0, Fiorentina í vil. Fiorentina fer í 4. sætið með 19 stig en Genoa er í neðsta sæti með 6 stig.