Segir að Rashford sé í heimsklassa - „Getur orðið einn af bestu leikmönnum heims"

Það vakti athygli þegar kom í ljós að Rashford væri á bekknum en Erik ten Hag stjóri liðsins staðfesti að hann væri í agabanni. Hann hefur nú skorað sex mörk í síðustu átta leikjum með United og enska landsliðinu.

Eftir markalausan fyrri hálfleik þurfti Ten Hag á Rashford að halda og hann kom inn á strax í hálfleik og skoraði sigurmarkið.

Luke Shaw sem hefur spilað í miðverði í síðustu tveimur leikjum segir að Rashford sé í heimsklassa.

„Hann er á mjög góðu róli þessa stundina, með mjög mikið sjálfstraust og mjög jákvæður. Hann er í heimsklassa og hann gæti orðið einn af bestu leikmönnum heims ef hann heldur svona áfram," sagði Shaw eftir leikinn.