lau 13.apr 2019
England: Moura fór illa með Huddersfield
Tottenham 4 - 0 Huddersfield
1-0 Victor Wanyama ('24 )
2-0 Lucas Moura ('27 )
3-0 Lucas Moura ('87 )
4-0 Lucas Moura ('90 )

Fallið Huddersfield var engin fyrirstaða fyrir Tottenham þegar liðin mættust í London í dag.

Það tók Tottenham tæpar 25 mínútur að ná forystunni. Þar var að verki miðjumaðurinn Victor Wanyama þegar hann fór framhjá Ben Hamer í marki Huddersfield og setti boltann í autt markið, mjög svo snyrtilegt.

120 sekúndum síðar tvöfaldaði Lucas Moura forskot Tottenham með föstu skoti eftir sendingu frá Moussa Sissoko. Lucas Moura var ekki búinn að syngja sitt síðasta í leiknum.

Huddersfield fékk nokkur færi til þess að klóra í bakkann í síðari hálfleik en það tókst ekki. Lucas Moura refsaði og skoraði sitt annað mark og þriðja mark Tottenham á 87. mínútu eftir fyrirgjöf frá Christian Eriksen.

Brasilíumaðurinn fullkomnaði þrennu sína í uppbótartíma þegar að hann setti boltann í netið eftir sendingu frá Heung-Min Son. Geggjaður dagur fyrir Moura!

Með sigrinum er Tottenham komið upp í þriðja sæti ensku úrvalsdeildarinnar.