þri 14.jún 2022
Kristján: Ekki skotæfing á morgun, hún var í gær
Kristján Guðmundsson
„Við nýttum ekki færin í dag, fáum færi strax i upphafi leiks sem við náum ekki að klára og strax eftir að við fáum á okkur markið fáum við mjög gott færi en við náum ekki að nýta þau og því fór sem fór.“ Sagði Kristján Guðmundsson þjálfari Stjörnunar sem laut í gras fyrir Keflavík 1-0 suður með sjó í kvöld í leik liðanna í 9.umferð Bestu deldar kvenna.

Stjarnan fékk urmull marktækifæra í leiknum en eftir því sem leið á leikinn virtist trúin á það að skora mark fara minnkandi í liði Stjörnunar. Hvort sem það var varnarmaður, Samantha í marki Keflavíkur eða hinn víðfrægi herslumunur vildi boltinn ekki inn. Hafði lið Kristjáns ekki trú á því að þær væru að fara að skora?

„Jú jú, við höfðum alveg trú því. Við kannski vönduðum okkur ekki nógu vel. En maður veit ekki, það er kannski það sama sem gerist í þessum færum okkar og þegar við verjumst þessu horni sem þær skora úr. Að það vanti einhver tíu prósent upp á allt sé klárt að negla þessu inn eða negla þesu frá en það var bara fullt af hlutum sem féll ekki okkar megin og það er bara stundum þannig í fótbolta.“

Kristján var að lokum spurður hvort hann hyggðist setja liðið á skotæfingu á morgun í ljósi færanýtingarinnar í kvöld og ekki stóð á svörum frá honum frekar enn fyrri daginn.

„Nei það verður alveg örugglega ekki skotæfing á morgun. Hún var í gær.“

Sagði Kristján glaðlega en allt viðtalið má sjá hér að ofan