fös 23.sep 2022
Emelía er í stiganum - „Hennar tími mun væntanlega koma"
Amanda Andradóttir og Emelía Óskarsdóttir.
Emelía Óskarsdóttir hefur verið að vekja athygli fyrir góða frammistöðu sína með Kristianstad í Svíþjóð.

Emelía, sem er 16 ára gömul, er búin að koma við sögu í níu leikjum í sænsku úrvalsdeildinni og skora eitt mark. Hún gerði eitt af mörkum Kristianstad í 3-1 sigri gegn Hammarby fyrir viku síðan.

Þorsteinn Halldórsson, landsliðsþjálfari, var í gær spurður að því hvort Emelía væri leikmaður sem hann og hans teymi væru að fylgjast með.

„Við fylgjumst með henni en hún er í landsliðs stiganum," sagði Steini.

„Hún er að spila með U17 og var að spila með U19 um daginn. Hún þróast og þroskast inn í þessum umhverfi. Hún hefur verið að koma vel inn og hennar tími mun væntanlega koma ef hún heldur áfram að þróast og þroskast vel."

Er framtíðin björt hjá henni?

„Algjörlega. Þetta snýst um að þú farir í ferilinn án mikilla meiðsla og takir réttar ákvarðanir með félagsliðin þín og allt það."

Emelía kemur úr mikilli fótboltafjölskyldu; faðir hennar er Óskar Hrafn Þorvaldsson, þjálfari Breiðabliks, og bróðir hennar er Orri Steinn Óskarsson, leikmaður FC Kaupmannahafnar og U21 landsliðsins.

Hún var í gær valin í hóp U17 landsliðsins sem tekur þátt í fyrstu umferð í undankeppni EM.