mán 23.jan 2023
Lampard skilur eftir sig hörmulega tölfræði hjá Everton
Everton er búið að reka Frank Lampard en liðið er bara með 15 stig eftir 20 leiki í ensku úrvalsdeildinni á þessu tímabili.

Það er lægsti stigafjöldi á þessu stigi mótsins í sögu félagsins (frá því að gefin voru þrjú stig fyrir sigur).

Everton hefur farið í gegnum átta síðustu deildarleiki án þess að vinna, tvö jafntefli og sex tapleikir. Það er lengsta skrið án sigurs á stjóraferli Lampard.

Lampard var innan við eitt ár í starfi á Goodison Park og tapið gegn West Ham á laugardag var níunda tapið í síðustu tólf deildarleikjum. Liðið er næst neðst í deildinni, markatölunni frá því að vera í neðsta sæti.

Lampard vann aðeins 12 af 44 leikjum sínum með Everton, sigurhlutfallið er því 27,27% sem er mun verra en hann var með sem stjóri Derby (42,1%) og Chelsea (52,4%).

Lampard fékk aðeins 0,92 stig að meðaltali í leik hjá Everton en aðeins Mike Walker (0,87) er með verri tölfræði sem stjóri liðsins í úrvalsdeildinni.

Daily Mail segir að Marcelo Bielsa, fyrrum stjóri Leeds, sé efstur á óskalista hæstráðenda hjá Everton í stjóraleitinni en eigandinn Farhad Moshiri tilkynnti Lampard með símtali í dag að ákveðið hefði verið að reka hann.

Næstu tveir deildarleikir Everton eru gegn Arsenal og Liverpool.