Martin Dubravka markvörður Newcastle er í ansi furðulegri stöðu en hann fær gullmedalíu um hálsinn ef Manchester United vinnur Newcastle í úrslitum enska deildabikarsins.

Leikurinn fer fram síðar í þessum mánuði en Dubravka fær ekki verðlaun ef Newcastle vinnur.

Þetta er vegna þess að Dubravka var á láni hjá United fyrri hluta tímabilsins en hann lék aðeins tvo leiki fyrir félagið, báða í deildabikarnum.

Það þýðir að hann er ólöglegur með Newcastle í keppninni en það skiptir liðið litlu máli þar sem NIck Pope stendur sem fastast milli stangana.

Dubravka var aðalmarkvörður Newcastle síðustu fjögur tímabil áður en Pope tók stöðuna á þessari leiktíð eftir komu frá Burnley í sumar.