fös 03.feb 2023
„Við vildum halda Jack og hann vildi vera hér áfram“
Jack Harrison.
Jesse Marsch, stjóri Leeds, útskýrði það á fréttamannafundi í dag hvernig ferlið var með Jack Harrison og Leicester á Gluggadeginum.

Samningur Harrison við Leeds rennur út 2024 og Brendan Rodgers, stjóri Leicester, greindi frá því að Leicester hafi gert tilboð í vængmanninn seint á Gluggadag.

„Á elleftu stundu kom eitthvað frá Leicester. Við höfðum í nokkurn tíma rætt við Jack um samninginn hans. Það hafði aðeins hægst á ferlinu," segir Marsch.

Leeds var búið að samþykkja tilboð frá Leicester en hætti skyndilega við.

„Þegar allt kom til alls þá vildum við halda Jack og hann vildi vera hérna áfram. Þess vegna er hann enn hjá Leeds. Við erum að vinna í að framlengja samning hans. Við gerðum okkur grein fyrir því að Jack þyrfti að vera áfram."