Styttist Liðin ganga þá til vallar og gera sig klár í slaginn

Liðin ganga þá til búningsklefa og gera sig klár í slaginn.

Annar leikur í gangi á sama tíma Kári Snorrason er mættur í Laugardalinn og ætlar að fylgjast grant með gangi mála í leik Vestra og HK sem er sannkallaður 6 stiga slagur.

Besta deildar veisla!

Byrjunarliðin klár: Úlfur byrjar - Rúnar á bekknum Skagamenn unnu Fylki 5-1 í síðustu umferð í Akraneshöllinni en Jón Þór Hauksson, þjálfari ÍA, gerir eina breytingu á hópnum frá þeim leik. Byrjunarliðið er óbreytt en Rúnar Már Sigurjónsson kemur inn á bekkinn fyrir Albert Hafsteinsson.

Heimir Guðjónsson, þjálfari FH, gerir tvær breytingar á Hafnarfjarðarliðinu frá sigrinum gegn HK á dögunum. Þeir Dusan Brkovic og Úlfur Ágúst Björnsson koma inn í liðið fyrir þá Vuk Oskar Dimitrijevic og Ólaf Guðmundsson, Vuk er á bekknum en Óli er meiddur. Úlfur er mættur aftur til landsins en hann var í skóla í Bandaríkjunum í vetur. Grétar Snær Gunnarsson kemur þá á bekkinn í stað Haraldar Einars Ásgrímssonar sem seldur var til Fram á gluggadeginum. Bjarni Guðjón Brynjólfsson, sem kom á láni frá Val, er ekki í hópnum.

Albert spáir í spilin Albert Brynjar Ingason, þáttastjórnandi Gula Spjaldsins og sérfræðingur í Stúkunni á Stöð 2 Sport, spáir í leikina sem eru framundan í fjórðu umferðinni. Þetta hafði hann að segja um leikinn sem við ætlum að fylgjast með:

ÍA 1- 1 FH (14:00 í dag)
Bæði lið með góða byrjun á mótinu og unnið síðustu tvo leiki sína, Skagamenn sterkir í Akraneshöllinni en FH-ingar með sína Skessu kunna alveg á þetta umhverfi. Skagamenn komast yfir og leiða 1-0 í hálfleik, Homie G kveikir á sínum með hálfleiksræðu sinni og Sigurður Bjartur jafnar þennan leik.

Dómarateymið Helgi Mikael Jónasson fær það skemmtilega verkefni að dæma þennan leik í dag. Honum til aðstoðar verða þeir Ragnar Þór Bender og Bergur Daði Ágústsson. Skiltadómarinn er Arnar Ingi Ingvarsson í dag en eftirlitsmaður KSÍ sem verður með stílabókina að vopni ser hann Jóhann Gunnar Guðmundsson

Nokkrir gamlir og skemmtilegir leikir liðanna ÍA og FH hafa mæst ofrar en einu sinni í gegnum tíðina en það er gaman að skoða gamla leiki og mörkin úr þeim milli þessara liða. Þessi leikur er nú ekki nema eitthvað tveggja mánaða gamall. Þá mættust liðin í Akraneshöllinni í úrslitaleik í Þungavigtabikarnum. Í þeim leik pökkuðu FH-ingar Skagamönnum saman 5-1.



Bikarsigur Skagamanna
Hér er rúmlega tveggja ára gamall leikur í Mjólkurbikarnum sem Skagamenn tóku 1-0 eftir marki frá Ísaki Snæ.



Heimasigur öflugs FH-liðs 2016
Þennan leik unnu FH-ingar 2-1 í Kaplakrika í efstu deild.



Stórskemmtilegt innslag
Síðan er þessi mjög skemmtilegur. Viðtöl og fleira sem fylgir þegar liðin skildu jöfn að stigum, 1-1, í Símadeildinni árið 2002.



Æsispennandi leikur sem Skagamenn tóku
Síðan er það elsti leikurinn frá 1995 þegar Skagamenn voru upp á sitt besta en þá unnu þeir góðan og spennandi 3-2 sigur.

Bank bank... já það er Akraneshöllin Fólki fannst það skrítið að ÍA hafi fengið leyfi frá KSÍ að spila heimaleikinn sinn gegn Fylki inni í Akraneshöllinni en núna skilur fólk ekkert í því hvernig þeir fá að spila tvo leiki í röð hérna inni. Skagamenn gerðu þó vel með umgjörð og þess háttar í kringum leikinn gegn Fylki en svona völlur og aðstaða á ekki að sjást í Bestu deildinni að mínu mati.

FH-ingar áttu slæma viku en byrja deildina ágætlega FH-ingar byrjuðu, líkt og Skagamenn, á tapi en hafa unnið næstu tvo leiki á eftir það. Frammistaðan hefur verið að skána hjá Hafnfirðingunum en leikurinn gegn Val í bikarnum í miðri viku var alls ekki upp á marga fiska. 3-0 tap og hræðileg frammistaða. FH-ingarnir setja núna allt sitt púður í deildina en eins og ég skrifaði hér að ofan að þá eru þeir með jafn mörg stig og ÍA eftir þrjá leiki.


Bara útileikir hjá FH
FH-ingarnir hafa byrjað leiktíðina á þremur leikjum sem eru allir útileikir en eins og flestir vita að þá er Kaplakrikavöllur ekki orðin klár fyrir sumarið. Ég er persónulega mjög spenntur að sjá hvernig FH-lið við munum fá í dag. Verður frammistaðan góð en úrslitin slæm eins og gegn Blikum í fyrsta leik eða munu úrslitin fylgja? Það getur allt gerst í Akraneshöllinni.

Þeir gulklæddu byrja vel Heimamennirnir í ÍA hafa byrjað leiktíðina frábærlega. Eftir 2-0 tap í fyrsta leik gegn Val hafa þeir náð að vinna Fylki á heimavelli sannfærandi og þar á undan rústað HK. Í báðum leikjunum hafa Skagamennirnir nýtt það frábærlega að andstæðingurinn fær rautt spjald. Þá keyra þeir á liðin og hrökkva í gang. Frábær byrjun hjá þeim gulklæddu en það var mikilvægt fyrir þá að byrja svona fyrir komandi leiki.


Tveir búnir að hrökkva í gang
Það sem gæti reynst Skagamönnum mikilvægt líka er að þeir eru að fá menn eins og Viktor Jóns og Hinrik Harðar í gang. Hinrik skoraði gegn Fylki á dögunum og var frábær í þeim leik. Viktor sömuleiðis en hann skoraði meðal annars þrennu gegn HK í Kórnum um daginn og er markahæstur í deildinni eins og staðan er í dag.

Sú lang besta! Heilir og sælir ágætu lesendur og verið þið hjartanlega velkomin í þessa þráðbeinu textalýsingu frá leik ÍA og FH í Akraneshöllinni. Já þið lásuð það rétt, í Akraneshöllinni.