Vítið án efa. Haukar höfðu ekki skapað sér færi til að tala um í 90 mínútur en fá svo vafasamt víti í uppbótartíma. Erfitt að halda öðru fram en að það ráði úrslitum.

Vítadómurinn klárlega. Fyrirgjöf inní teiginn virðist fara í upphandlegg Adolf Mtasingwa Bitegeko af tiltölulega stuttu færi sem var þó með hendur þétt upp við líkamann. Flestir þeir sem ég hef rætt við segja glórulaus dómur og ekki eftir bókinni góðu.

1 stig á lið gerir lítið fyrir liðin í töflunni sætalega séð en Keflavík fer í 5.sætið með 15 stig en Haukar enn í því 9. með 10 stig.

Baráttuleikur að baki og bæði lið spiluðu af hörku. Engin eitthvað áberandi slakur en Adolf Mtasingwa Bitegeko mun ekki sofa mikið í nótt þótt mér sé til efs að dómurinn gegn honum hafi verið réttur.

Valdimar var ekkert spes í dag. Mér fannst hann byrja leikinn vel og svo fannst mér hann hreinlega skipta bara um línu og var langt í frá samkvæmur sjálfum sér. Vítadómurinn er svo sér kafli út af fyrir sig sem í heildina hefur þó ekki mikil áhrif á einkunn hans.