PSG er einfaldlega eitt besta félagslið heims. Það hefði allt þurft að ganga á afturfótunum hjá þeim og Blikar að eiga sinn allra besta til leik til að ná stigi eða stigum í kvöld.

Rúmlega 1300 manns mættu á völlinn og stemmningin var góð. Aðdáendur PSG létu betur í sér heyra lengst af en það kviknaði heldur betur á ungum stuðningsmönnum Blika er líða tók á seinni hálfleikinn. Þau sungu og trölluðu og studdu vel við sitt lið. Þeir allra hörðustu rifu sig meira að segja úr að ofan. Gaman að því svona um miðjan október.

PSG er í ansi vænlegri stöðu fyrir síðari leik liðanna sem fram fer í París þann 31. október.

Pass. Boltanum var mikið dælt inn á teig hjá Blikum. Leikmenn PSG eflaust pirraðar að hafa ekki náð að skapa sér fleiri dauðafæri en það væri skrítið að tala um vondan dag eftir 4-0 sigur á útivelli. Eins voru allir leikmenn Blika að gera sitt besta, það var bara ekki nóg gegn firnasterkum andstæðingunum.

Stuðningsmenn Blika pirruðu sig í nokkur skipti og fannst dómararnir bera fullmikla virðingu fyrir gestunum. Eftir endursýningar af þeim atvikum virtist tríóið þó hafa gert rétt í öllu nema einu tilfellinu.