Gæðin og reynslan kláruðu dæmið fyrir Val. Leikurinn var kaflaskiptur. Valskonur byrjuðu með látum og áttu þrjú skot í tréverkið á fyrstu 13 mínútunum. Nýliðarnir stóðu af sér stórsóknirnar og voru síst síðri aðilinn út fyrri hálfleikinn. Íslandsmeistararnir mættu svo betur stilltar til leiks í seinni hálfleik, voru þolinmóðar og klókar og komust í 2-0. Þróttarar gáfust þó ekki upp og náðu að minnka muninn undir lokin. Áhorfendur fengu því spennandi leik frá upphafi til enda. Íslandsmeistararnir sýndu gæði í að klára leikinn en nýliðarnir mega vera stoltar af sinni frammistöðu þrátt fyrir tap.

Þróttarar vildu meina að þær hefðu skorað mark á 25. mínútu. Margrét Sveins náði þá skoti á markið eftir harða baráttu við varnarmenn Vals og Söndru markmann. Boltinn fór klárlega að einhverju leyti yfir marklínuna áður en Lillý hreinsaði en eftir að hafa séð endursýningu fór boltinn líklega ekki allur yfir línuna og því rétt að dæma ekki mark.

Valskonur byrja mótið af krafti og eru með 6 stig eftir tvær fyrstu umferðirnar. Nýliðarnir eru hinsvegar stigalausar.

Það voru nokkrar Valskonur sem mér fannst ekki ná sér á strik í kvöld en ég skutla þessu á systurnar Örnu og Hlín Eiríksdætur fyrir sjaldséða feila. Arna átti slaka sendingu til baka sem Linda Líf komst inní og tókst að skora upp úr. Hlín tókst svo á einhvern ótrúlegan hátt að skjóta yfir fyrir opnu marki af markteig þegar hún hefði getað lokað leiknum fyrir Val. Þá er erfitt að líta framhjá mistökum Þróttarans Andreu Magg í fyrra marki Vals.

Stóru atriðin virðast hafa verið rétt. Dómarar virðast oft ragir við að gefa spjöld þegar þeir dæma hjá konum en sú var ekki raunin í kvöld. Það fóru heil 7 spjöld á loft. Þar af fyrstu fjögur fyrir tuð. Gott og blessað en ég velti því fyrir mér hvort það hefði ekki verið eðlilegra ef tvö af þessum fjórum tuðspjöldum hefðu farið á loft fyrir brotin sem var mótmælt.