Leikplan ÍBV gekk upp í dag. Eyjamenn lágu til baka lengstan kafla leiksins og voru lítið í því að pressa leikmenn KA fyrr en við miðlínu. KA var mun meira með boltann og sótti meira en náði ekki að opna vörn Eyjamanna nægilega oft. Sóknir Eyjamanna voru vel úthugsaðar og Helgi þjálfari talar um 'masterplan' þegar hann ræðir um skiptingar sínar sem gengu upp.

1-2 markið ræður í raun úrslitum í kvöld og er það því atvik leiksins. Felix, sem átti fínan dag, átti góða fyrirgjöf sem Víðir kom í netið. Markið hjá Grímsa beint úr horni gerir einnig tilkall en ekki jafn mikilvægt þegar upp var staðið.

ÍBV er komið í 8-liða úrslit og er enn taplaust í sumar. KA er komið í frí þar til boltinn fer að rúlla aftur.

Enginn sem var eitthvað áberandi verri en annar í þessum leik. Eigum við ekki að segja að löppin á Eyþóri hafi átt betri dag. Eyþór var orðinn þreyttur snemma í fyrri hálfleik framlengingarinnar og fær svo krampa þegar Grímsi labbaði framhjá honum í seinni hálfleik framlengingarinnar. Efast um að Eyþór fari á hlaupabrettið á morgun.

Helgi Mikael Jónsson var flottur í kvöld.