Leiknisliðið fékk nokkur tækifæri til að bæta við mörkum en létu vítaspyrnu Sævars Atla duga. Þeir voru heilt yfir sterkari aðilinn og með smá heppni og gæðum hefði sigurinn orðið stærri. Magnamenn gáfust þó aldrei upp og Kairo Edwards-John gerði varnarmönnum Leiknis oft lífið leitt með krafti sínum og leikni.

Vítaspyrnudómurinn. Það fer eftir því hvern þú spyrð hvort Vuk hafi átt að fá víti þegar Arnar Ingi benti á punktinn. Sigurður Heiðar, þjálfari Leiknis sagði að um augljósa vítaspyrnu hefði verið að ræða en heimamenn segja dóminn kolrangan.

Leiknismenn tylla sér á toppinn, en Fram og Keflavík eiga bæði leiki til góða til að komast fram úr Breiðhyltingum. Magnamenn verma botnsætið og þurfa að vona að Keflvíkingar vinni Þrótt R. til að halda stigamuninum á þeim og Þrótturum ennþá í þremur stigum. Baráttan um áframhaldandi veru í deildinni verður blóðug.

Arnar Ingi mun eiga betri daga á dómaraferlinum. Ekki nægilega gott samræmi í dómgæslunni og ég er ekki algjörlega sannfærður um að hann hafi verið með vítaspyrnudóminn réttan, sem var það sem skildi liðin að þegar á hólminn var komið.

Hafði ekki góð tök á leiknum og virtist pirra bæði lið jafn mikið.