Léleg spilamennska í seinni hálfleik varð Þrótturum að falli en eftir fyrsta mark ÍBV sem kom eftir rúman tíu mínútna leik í seinni hálfleik þá voru Þróttur varla með. Mættu lítið á Eyjamenn, þorðu ekki að spila sig út úr fyrstu pressu og gáfu boltann mest megnis aftur á Eyjapeyjana þegar þeir unnu boltann.

Hálfleikurinn. Bæði lið virtust senda ný lið út á völl í seinni hálfleik því leikurinn var allt annar eftir helmingaskiptin á 45. mínútu. Þróttur sá ekki til sólar og ÍBV voru mjög góðir í seinni hálfleik.

Eins og fyrirsögnin segir þá er útlitið orðið heldur svart fyrir Laugdælinga en eftir leiki dagsins er liðið í 11. sæti Lengjudeildarinnar. Þróttarar eru með 12 stig eftir 18 leiki, mínus 22 í markatölu og bara 15 mörk skoruð en það er einmitt þetta síðastnefnda sem sendir liðið í fallsæti þar sem að þeir eru jafnir Leikni Fáskrúðsfirði að stigum og markatölu, en með færri mörk skoruð. Fyrir Eyjamenn þá heldur þetta lífi í veikri von þeirra á sæti í Pepsi Max deildinni 2021 en liðið er ennþá sex stigum á eftir Leikni og Fram, þegar fjórar umferðir eru eftir af mótinu.

Tyler Brown var ágætur í fyrri hálfleik og þá sérstaklega sóknarlega en varnarleikurinn sem maðurinn bauð upp á í seinni hálfleik var ekki til útflutnings (eða innflutnings?). Tyler átti að gera betur í fyrra marki Jack Lambert og svo hefði ábyggilega ekki skemmt fyrir Þrótturum ef hann hefði aðeins hlaupið í seinni hálfleiknum.

Gunnar Oddur gerði enga feila í leiknum frekar en hans aðstoðarmenn. Lét leikinn fljóta ágætlega og gaf spjöld á réttum stað og réttri stund. Alltaf gaman þegar umræðan eftir leiki getur 0% snúist að dómurunum og 100% að fótboltanum sem var spilaður á vellinum.