Bæði lið voru klaufar að klára ekki leikinn í dag. KR byrjuðu betur og hefðu átt að komast yfir snemma í leiknum en fóru illa með færin sín. Valsarar voru svo klaufar að missa forystu niður tvisvar í leiknum með því að fá á sig nokkuð ódýr mörk.

Það var mjög falleg stund fyrir leikinn þegar goðsögnin Bjarni Fel var heiðraður með fögrum orðum og mínútu þögn. Það var svo kerti í fjölmiðlastúkunni þar sem Bjarni sat ósjaldan og greinilegt að hans verður saknað.

KR tekur stig og fara brattir inn í þessa síðustu leiki með Evrópusætið að leiðarljósi. Þeir eiga innbyrðis leiki eftir við öll þau lið sem þeir eru í baráttu við þannig að þetta er enn allt í þeirra höndum. Valsarar eru svo gott sem öruggir með annað sætið og þarf eitthvað mikið að fara úrskeiðis svo það klikki. Þessi úrslit þýða svo auðvitað það að Víkingar urðu sófameistarar.

Það á í rauninni enginn skilið að vera hent í þennan dálk eftir leikinn. Eins og áður segir hefðu bæði lið getað farið betur með færin sín í leiknum og verða líklega einhverjir svekktir með ákveðin augnablik en heilt yfir var þetta bara nokkuð góður leikur af fótbolta.

Mér fannst Jóhann og hans teymi gera þetta vel í dag. Það var ágætis flæði á leiknum og hann greip bara inn í þegar þess þurfti. Menn voru eitthvað ósammála um það hvort að vítaspyrnudómurinn hafi verið réttur en undirrituð er ekki búin að sjá atvikið aftur og getur því ekki sagt til um það.