Fylkismenn vildu þetta bara þeim mun meira í dag. Keflvíkingar áttu ágætis fyrri hálfleik en hengdu haus um leið og þeir fengu á sig mark og Fylkismenn gengu á lagið. Andleysi Keflvíkinga var því miður algjört í síðari hálfleik á meðan að Fylkismenn þjöppuðu sér saman og unnu sanngjarnt.

Rauða spjald Sindra Þórs. 38 sekúndur alls og 21 sekúnda eftir að leikur fór aftur í gang. Fer í bilaða tæklingu á Nikulás Val og frá mér séð fær hann réttilega rautt spjald. Sennilega aðeins of peppaður í verkefnið og ætlað að láta heldur betur finna fyrir sér með þessum leiðinda afleiðingum.

Fylkir er í kjörstöðu í fallbaráttu deildarinnar og þarf enga aðra að treysta á nema sjálfa sig. Þeir eru þó ekki hólpnir enn sem gæti þó breyst með hagstæðum úrslitum úr leik HK og ÍBV.

Sindri Þór Guðmundsson vil örugglega gleyma þessum 38 sekúndum alls sem liðu frá því að hann steig inn á völlinn þangað til hann fékk að líta rauða spjaldið. Eitt að koma inn af krafti en þetta var mögulega full mikið af hinu góða.

Þórður átti stórfínan leik, var með stóru atriðin á hreinu í dag og skilaði sínu af stakri prýði. Með aukinni reynslu af dómgæslu verður hann bara betri.