Byrjunarliðin eru komin nú þegar klukkutími er í upphafsspark.

Selfoss vann FH 1-0 í síðustu umferð en ein breyting er gerð frá þeim leik. Grace Rapp er ekki með og kemur Íris Sverrisdóttir inn í hennar stað. Landsliðskonan Dagný Brynjarsdóttir er enn á varamannabekknum, en hún eignaðist sitt fyrsta barn í júní. Fyrirliðinn Anna María Friðgeirsdóttir er jafnframt á bekknum hjá Selfossi.

Grindavík byrjar með sama lið og tapaði 2-1 fyrir Stjörnunni í síðustu umferð.

Með flautuna í dag er Kristján Már Ólafs. Honum til aðstoðar eru Árni Heiðar Guðmundsson, Sigurður Schram og Eiður Ottó Bjarnason. Eftirlitismaður KSÍ er Ólafur Ingi Guðmundsson.

Við óskum þeim öllum góðs gengis hér á JÁVERK-vellinum!

Svava Rós Guðmundsdóttir, leikmaður Roa í Noregi, lýsti þessum leik sem ,,mest spennandi" leik umferðarinnar. Fótbolti.net fékk hana til að spá í leiki umferðarinnar.

Selfoss 2 - 0 Grindavík (klukkan 18:00 í kvöld)
Fyrir mér er þetta mest spennandi leikurinn. Grindavík þarf nauðsynlega að næla sér í stig til að halda í við KR og til að eiga möguleika á að halda sér uppi. En ég held að gæðin í Selfoss liðinu sigli sigrinum heim.

Smelltu hér að skoða spánna í heild sinni.

Fyrir leikinn í dag er Selfoss sjötta sæti með 15 stig en Grindavík er í næst neðsta sæti með níu stig. Grindavík hefur tapað fimm deildarleikjum í röð, en liðinu til varnar hefur leikjaplanið verið fáránlega erfitt. Síðustu fjórir leikir liðsins hafa verið gegn Stjörnunni, Val Breðabliki og Þór/KA - fjórum sterkustu liðum deildarinnar.

Fylgist sérstaklega með þessum leikmönnum:

Magdalena Anna Reimus (Selfoss): Hefur verið í lykihlutverki hjá Selfossi í sumar og líklega besti leikmaður nýliðanna heilt yfir. Er sterk á miðjusvæðinu.

Rio Hardy (Grindavík): Enskur framherji sem kom hingað til lands ásamt tvíburasystur sinni, Steffi. Rio hefur skorað sex mörk í 10 leikjum í sumar og verið sterkasti leikmaður Grindavíkur.

Ísabel Jasmín Almarsdóttir (Grindavík): Efnilegur fyrirliði Grindvíkinga.

Vivane Holzel Domingues (Grindavík): Einn besti markvörður deildarinnar.

Anna María Friðgeirsdóttir (Selfoss): Fyrirliði Selfoss, uppalin og hjartað slær þar. Góður varnarmaður.

Þessi lýsing verður í léttari kantinum þar sem fylgst verður með leiknum í beinni útsendingu á Stöð 2 Sport.

Góðan og margblessaðan daginn. Hér munum við fylgjast með viðureign Selfoss og Grindavíkur í Pepsi-deild kvenna. Þetta er fyrsti leikurinn í 14. umferð deildarinnar, en hinir leikir umferðarinnar eru spilaðir á morgun og á þriðjudag.

Breiðablik og Stjarnan mætast í bikarúrslitum á morgun og eru þau lið því ekki í eldlínunni, margumtöluðu, fyrr en á þriðjudaginn.