Liðin eru að ljúka upphitun og það styttist í þessa Inkasso veislu!

Það verður áhugavert að sjá hvernig þessi leikur kemur til með að þróast. Munu Haukar liggja til baka og freista þess að beita skyndisóknum eða munu þeir sækja á móti sókndjörfu liði Þróttar?

Köttararnir eru að gæða sér á börger og með því í hvíta tjaldinu góða. Ég þyrfti eiginlega að næla mér í einn fyrir leik.

Það er alltaf svo notalegt að koma á Eimskipsvöllinn. Öll umgjörð hér er til fyrirmyndar, kaldur og gos í kæli ásamt súkkulaði og ekki má gleyma frægu hamborgurunum sem boðið er upp á. Myndi gefa umgjörðinni heilt yfir góða 9,7/10. Enginn er fullkominn en þetta er ansi nálagt því!

Veðrið er aðeins að stríða myndatökumanni stöðvar2sport og þarf hann að færa sig í stúkuna til að geta sýnt þennan leik í beinni. Skynsamleg ákvörðun þar sem hann myndi eflaust fjúka af gámnum hinum megin í góðri vindhviðu.

Veðurspá kvöldsins: Það blæs duglega frá vinstri til hægri í átt að Laugardalsvelli. Sólin lætur sjá sig við og við en svo koma skúrir þess á milli. Vinur minn sem er mikill Haukamaður í þokkabót hann Gummi "Tölfræði" segir að sólin muni vera um 67% tímans en rigning eða skúrir 23% tímans. Ég treysti Gumma og hans tölfræi en svo mæli ég einnig með góðri úlpu það er að koma september og þá fylgir kuldi með því miður við búum jú á Íslandi.

Byrjunarliðin eru klár og má sjá þau hér til hliðar.

Hjá Þrótti byrjar markavélin Viktor Jónsson að sjálfsögðu í fremstu víglínu og treystir á Emil Atlason og Jasper Van der Heyden til að skapa fyrir sig færi!

Hjá Haukum byrjar fyrirliðin Gunnar Gunnarsson ásamt Indriða Áka Þorlákssyni og gæjanum með svalasta nafnið í deildinni Elton Renato Livramento Barros

Fyrir þennan leik eru liðin á sitthvorum endanum í töflunni.

Þróttur hefur verið á fljúgandi siglingu undanfarnar vikur og sitja í 3 sæti með 35 stig og narta verulega í hælana á HK og ÍA sem eru í efstu tveimur sætunum með 40. og 39. stig.

Haukar eru hinsvegar í 9. sæti og í harðri botnbaráttu. Þeir eru með 17. stig líkt og ÍR sem tapaði í gær fyrir Fram og aðeins tveimur stigum fyrir ofan Selfoss í fallsætinu sem að tapaði fyrir Leikni R. í gær.

Í stuttu máli gott fólk... Bæði lið þurfa lífsnauðsynlega sigur í kvöld. Þróttur til þess að halda áfram að þrýsta á efstu tvö liðin og Pepsí drauminn. Haukar til þess að losa sig burt frá fallbaráttunni.

Komiði blessuð og sæl og verið velkomin í beina textalýsingu frá leik Þróttar og Hauka í Inkasso ástríðunni og hefst leikurinn klukkan 19:15 á Eimskipsvellinum í hjarta Reykjavíkur.