Liðin skipta um vallarhelming. Valsmenn sækja í átt að gömlu Keiluhöllinni en Keflvíkingar í átt að miðbænum.

Patrick Pedersen, framherji Vals, er með 17 mörk í deildinni í sumar. Hann getur jafnað markametið í efstu deild ef hann nær að skora tvö mörk í dag.

Fullt af krökkum úr yngri flokkum Vals niðri á velli til að taka á móti leikmönnum. Einar vallarþulur í S-inu sínu þegar hann kynnir liðin. Þetta fer að skella á!

Stúkan orðin þétt setin og ennþá 10 mínútur í leik. Valsmenn eru peppaðir enda geta þeir landað Íslandsmeistaratitli í dag.

Liðin mætt út á völl í upphitun. Mælum með að stilla inn á X-ið og hlusta á beina lýsingu frá öllu sem gerist í dag!

Verið er að vökva völlinn. Líf og fjör í Fjósinu hjá stuðningsmönnum Vals og fyrstu stuðningsmennirnir mættir í stúkna.

Liðin eru hér til hliðar. Haukur Páll Sigurðsson, fyrirliði Vals, snýr aftur eftir leikbann og kemur inn í liðið fyrir Guðjón Pétur Lýðsson. Valsmenn eru með sama lið og gegn FH að öðru leyti.

Miðjumaðurinn reyndi Hólmar Örn Rúnarsson spilar kveðjuleik sinn með Keflavík í dag en hann var í vikunni ráðinn þjálfari hjá Víði Garði í 2. deildinni.

Sindri Þór Guðmundsson kemur inn í bakvörðinn fyrir Anton Frey Hauks Guðlaugsson hjá Keflavík. Adam Árni Róbertsson kemur einnig inn fyrir Tómas Óskarsson. Marc McAusland er fjarri góðu gamni en hann er skráður sem liðsstjóri á bekknum.

Miðjumaðurinn reyndi Hólmar Örn Rúnarsson spilar kveðjuleik sinn með Keflavík í dag en hann var í vikunni ráðinn þjálfari hjá Víði Garði í 2. deildinni.

Valsmenn höfðu betur 2-0 í fyrri leik liðanna í sumar. Hvað gerist hér í dag?

Hörður Magnússon, umsjónarmaður Pepsi-markanna, spáir í leiki umferðarinnar.

Valur 6 - 0 Keflavík
Lið sem hefur ekki unnið leik á Íslandsmótinu í 21 leik er ekki að fara á Hlíðarenda og gera vel á móti Val sem er með besta lið landsins. Valsmenn fá tækifæri til að gulltryggja þetta og þeir láta það tækifæri ekki framhjá sér fara. Þeir verja titilinn.

Sextán leikmenn eru í leikbanni í lokaumferð Pepsi-deildarinnar. Leikmenn Vals og Keflavíkur voru hins vegar prúðir í næstsíðustu umferðinni og enginn þeirra er í banni.

Haukur Páll Sigurðsson, fyrirliði Vals, snýr aftur í liðið í dag eftir að hafa verið í banni í tapinu gegn FH um síðustu helgi.

Góðan daginn!

Hér verður bein textalýsing frá leik Vals og Keflavíkur í lokaumferð Pepsi-deildarinnar.

Valsmenn eru á toppnum fyrir leikinn og freista þess í dag að verða Íslandsmeistarar annað árið í röð. Valsmenn verða meistarar ef þeir vinna í dag og líklega mun jafntefli einnig duga þeim.

Keflvíkingar eru á botninum með fjögur stig og eru í leit að sínum fyrsta sigri í sumar.