Fyrir leik
Davíð Snorri Jónasson, landsliðsþjálfari U17 karla, hefur tilkynnt byrjunarlið Íslands fyrir leikinn gegn Portúgal.

Þrjár breytingar eru gerðar á liðinu frá því í leiknum gegn Ungverjalandi, en þeir Andri Fannar Baldursson, Andri Lucas Guðjohnsen og Ísak Bergmann Jóhannesson koma aftur inn í liðið. Út fara Hákon Arnar Haraldsson, Danijel Dejan Djuric og Kristall Máni Ingason.

Ísland fer áfram í átta liða úrslitin með jafntefli eða sigri, en bæði liðin eru með þrjú stig. Ísland er hins vegar búið að skora einu marki fleiri og eru því sem stendur í öðru sæti riðilsins.
Eyða Breyta

Fyrir leik
U17 ára landslið Íslands mætir Portúgal í lokaleik liðsins í riðlinum í lokakeppni EM. Í dag mætir liðið Portúgal á City Calling leikvanginum í Longford á Írlandi. Leikurinn hefst klukkan 16:00 á íslenskum tíma. Ísland dugar jafntefli í leiknum til að komast í 8-liða úrslit.

Eftir 3-2 sigur á Rússlandi í fyrstu umferðinni þurfti liðið að sætta sig við tap gegn Ungverjum 2-1 þar sem Ungverjarnir skoruðu sigurmarkið úr víti í uppbótartíma.

"Það var grautfúlt. Eftir fast leikatriði og óheppni inn í teig fáum við á okkur vítaspyrnu. Það er lítið við því að gera. Ég var búinn að vera mjög ánægður með leikinn. Það var jafnteflisfnykur af þessum leik en við vorum fannst mér líklegri þegar leið á leikinn. Því var þetta extra svekkjandi," sagði Davíð Snorri Jónasson þjálfari liðsins í samtali við Fótbolta.net spurður út í Ungverjaleikinn.

"Þeir voru betri en við í fyrri hálfleik en við vorum betri í seinni. Þetta var svekkjandi en ég var mjög ánægður með seinni hálfleikinn."

"Það er geggjað að fá svona leik og mótið er galopið ennþá. Við erum að reyna púsla saman því sem við viljum að verði gert vel á morgun og við ætlum að leitast eftir því að fá góða frammistöðu. Það vonandi skilar okkur því sem við þurfum. Það er frábært að fá tækifæri til að spila svona leik."

Hann segir að möguleikarnir séu góðir fyrir leikinn í dag.

"Portúgalarnir eru tæknilega góðir og eru með góða einstaklinga sem fara mikið einn á einn. Ef við spilum á því sem við stöndum fyrir og spilum eins og við erum vanir að gera þá eigum við góða möguleika. Þessi riðill hefur verið mjög jafn og þetta hafa verið allt hörkuleikir," sagði Davíð Snorri sem staðfesti að allir leikmenn íslenska liðsins væru klárir í leikinn og engin meiðsli væru að plaga menn.
Eyða Breyta