Sjöunda umferðin hófst í gær með leik Grindavíkur og Víkings og endaði hann með markalausu jafntefli. Núna klukkan 16:00 hófust svo tveir leikir, ÍBV-ÍA og KR-KA. Þessi leikur hefst klukkan 17:00 og svo lýkur henni klukkan 19:15 með tveimur leikjum, HK-Fylkir og stórleikur Stjörnunnar og Vals. Það er því alvöru umferð hér rétt fyrir landsleikjahlé.

Þá eru byrjunarliðin klár.

Blikar gera fjórar breytingar frá síðasta leik þeirra gegn HK í bikarnum. Þeir Guðmundur Böðvar, Höskuldur Gunnlaugsson, Byrnjólfur Darri og Kwame Quee koma út og inn koma Elfar Freyr, Aron Bjarnason, Thomas Mikkelsen og Andri Rafn Yeoman.

FH-ingar gera tvær breytingar eftir sigurinn gegn Skagamönnum í bikarnum. Þeir Guðmann Þórisson og Cédric D'Ulivo koma inn í stað þeirra Péturs Viðarssonar og Hjartar Loga Valgarðssonar sem að eru hvorugir í hóp í dag.

Bæði lið unnu góða sigra í 16-liða úrslitum Mjólkurbikarsins í vikunnu. Breiðablik tók á móti grönnum sínum í HK og endaði sá leikur 3-1 fyrir Blikum. Kwame Quee, Guðjón Pétur Lýðsson og Höskuldur Gunnlaugsson skoruðu mörkin.

Þá tóks FH-ingum að stöðva Skagalestina með 2-1 sigri í Kaplakrika þar sem að Steven Lennon og Jákup Thomsen skoruðu mörkin. Þetta var fyrsta tap Skagamanna í sumar.

Breiðablik heimsóttu Íslandsmeistara Vals í síðustu umferð og lauk þeim leik með 1-0 sigri Blika. Andri Rafn Yeoman skoraði markið.

FH-ingar heimsóttu Fylkismenn í Árbæjinn og lauk þeim leik með 2-2 jafntefli. Hjörtur Logi Valgarðsson og Brandur Olsen sáu um að skora mörk Hafnfirðinga.

Heimamenn í Breiðablik sitja í öðru sæti deildarinnar með 13 stig á meðan að FH-ingar sitja í því fjórða með 11 stig. Hér er því um að ræða alvöru sex stiga leik.

Komiði sæl og blessuð og veriði hjartanlega velkomin í þessa beinu textalýsingu á leik Breiðabliks og FH í 7.umferð Pepsi Max-deildar karla.