Breiðablik og Valur sem einnig er spáð toppbaráttu hafa byrjað sína leiki með látum og verið búin að skora eftir 2 mínútur. Ætli annað hvort liðið fylgi því fordæmi í þessum lokaleik dagsins?

Nú fer þetta alveg að skella á. Byrjunarliðin eru klár eins og sjá má hér til hliðar og það er fátt sem kemur á óvart.

Selfoss keyrir á sama liði og sigraði Val í Meistarakeppninni og hjá Fylki byrjar nýliðinn Sólveig Larsen.

Bæði lið hafa unnið titla í vetur. Fylkir varð Reykjavíkurmeistari í fyrsta skipti í sögunni og Selfoss vann Meistarakeppni KSÍ um síðustu helgi.

Í Árbænum er stefnt að því að bæta besta árangur liðsins í efstu deild sem er 5. sæti.

Á Selfossi er hinsvegar talað mjög opinskátt um það að liðið stefni á að vinna tvöfalt.

Metnaðarfull markmið hjá báðum liðum og það verður gaman að fylgjast með hvernig til tekst.

Bæði lið eru töluvert breytt frá því í fyrra og að öllum líkindum enn öflugri en á síðasta tímabili enda fengið öflugan liðsstyrk.

Fylkir hefur fengið til sín tólf nýja leikmenn. Tíu þeirra hafa spilað yngri landsleik fyrir Ísland og drottningin hún Vesna Smiljkovic lék með serbneska landsliðinu í áratug og á yfir 230 leiki í efstu deild og bikar hér heima. Það verður gaman að sjá hvort að hún nái sér á strik með Fylki í sumar.

Selfyssingar hafa einnig verið iðnar á leikmannamarkaðnum og náð sér í hrikalega stóra bita. Landsliðskonurnar Anna Björk Kristjánsdóttir og Dagný Brynjarsdóttir eru þar vissulega þekktustu nöfnin en unglingalandsliðskonan Clara Sigurðardóttir er einnig hrikalega spennandi viðbót. Þá hefur mikið verið talað um markvörðinn Kaylan Jenna Marckese og senterinn Tiffany Janea MC Carty en þær eiga að vera öflugar.

Liðin gerðu 1-1 jafntefli þegar þau mættust í Árbænum í fyrra en Selfyssingar tóku síðari leikinn, á Selfossi, 1-0

Kynningarfundur Pepsi Max deildar kvenna fór fram á fimmtudag og þar var hin árlega spá formanna, þjálfara og fyrirliða um lokastöðu liðanna opinberuð. Fylki var spáð 4. sætinu og Selfossi 2. sæti. Þetta er í takt við aðrar spár en bæði Fótbolti.net og Heimavöllurinn spá Selfyssingum 3. sæti. Fótbolti.net setur Fylki í 5. sæti en Heimavöllurinn það fjórða.

Spárnar eru þó vissulega aðeins til gamans gerðar og eina leiðin fyrir liðin til að taka þátt í toppbaráttu er að standa sig úti á velli og vinna fótboltaleiki.

Gleðilegan laugardag!

1. umferð Pepsi Max deildarinnar heldur áfram að rúlla og núna kl.17:00 hefst RISA leikur tveggja liða sem er spáð góðu gengi í sumar.

Fylkir tekur á móti Selfossi á Wurth-vellinum.