Mögulega síðasti séns hjá Víkingnum. Nadía spænir upp vinstra megin en fyrirgjöf hennar endar í öruggum höndum Amber.

Þetta er orðið spennandi hér í lokin. Mikil barátta og Víkingar leita að jöfnunarmarkinu. Nú var Nadía að sneiða boltann framhjá eftir fyrirgjöf Töru.

Endurtekið efni í Víkinni. Víkingar fá aukaspyrnu út til vinstri. Stefanía tekur. Setur ágætan bolta inn á teig sem Amber reynir að kýla. Það tekst þó ekki betur en svo að boltinn fer aftur fyrir í horn.

Það myndast hætta í vítateignum eftir hornspyrnuna en Murielle er mætt alla leið til baka og hreinsar frá.

Anna Margrét brýtur af sér úti í vinstra horninu og Víkingar fá enn eina aukaspyrnuna. Stefanía setur boltann í átt að Ástrós en hún nær ekki góðum skalla og boltinn svífur yfir pakkann.

Mér sýnist Víkingar vera komnar í 4-4-2 með Nadíu og Ástrós uppá topp. Freista þess að finna jöfnunarmark.

Víkingar aðeins að sýna klærnar eftir heldur slakan síðari hálfleik. Geta þær komið til baka?

Nadía gerir sig líklega í teignum en Laufey nær til boltans og setur hann í horn. Stefanía tekur. Setur háan bolta á fjær þar sem Rut rís hæst og skallar í markið. Það hangir hinsvegar einhver Víkingurinn í Amber markverði og Þorfinnur dæmir markið réttilega af.

Geggjuð varsla!

Halla Margrét með þvílík viðbrögð og ver skot Jacqueline eftir sendingu Murielle.

Boltinn endar svo hjá Laufey sem á skot í varnarmann og aftur fyrir. Stólarnir fá svo enn eitt hornið sem ekkert verður úr.

Áfram halda Stólarnir að vinna horn. Jacqueline er í yfirvinnu í öllum þessum auka- og hornspyrnum. Þessi hornspyrna er þó sú slakasta til þessa og Víkingar snúa vörn í sókn.

Tvö horn í röð hjá Stólunum. Murielle vinnur skallann í því seinna en sneiðir fyrirgjöf Jacqueline rétt framhjá.

Víkingar fá aukaspyrnu úti til vinstri. Stefanía á hættulegan bolta inná teig og Brynhildur Vala gerir sig líklega. Varnarmenn Tindastóls hafa hinsvegar betur og koma þessu frá.

Þær bruna svo í sókn og vinna horn. Jackie á enn eina spyrnuna í átt að Bryndísi sem skallar yfir.

Tindastóll fær aukaspyrnu vinstra megin við vítateig Víkinga. Jacqueline tekur og setur boltann á fjær. Þar er Aldís María í algjöru dauðafæri en rétt missir af boltanum!

Murielle er alltaf hættuleg inná vítateig andstæðinganna. Nú fær hún smá pláss og á fínt skot vinstra megin úr teignum. Halla ver boltann út í teiginn en Víkingar ná að hreinsa.

Varnarmenn Tindastóls ráða illa við hraðann hjá Nadíu og brjóta á henni áður en hún kemst inná vítateig hægra megin. Víkingar fá aukaspyrnu. Mér sýnist það vera Stefanía sem setur hættulegan bolta fyrir á Dagný sem skallar yfir.

Geggjuð tækling hjá Margréti Evu. Nær boltanum af Murielle rétt áður en hún finnur skotið í vítateig Víkinga. Laufey átti sendinguna sem sendi Murielle innfyrir. Vinstri bakvörðurinn að eiga flottan leik, bæði varnar- og sóknarlega í kvöld.

Víkingar hefja seinni hálfleikinn á að næla sér í aukaspyrnu á miðjum vallarhelmingi gestanna. Stefanía Ásta reynir skot úr spyrnunni en það er beint á Amber.

Önnur aukaspyrna úti á miðjum velli. Nú eru það Víkingar sem brjóta. Jacqueline tekur allar spyrnur gestanna og setur háan bolta inná markteig. Þar er Bryndís sem fyrr í baráttunni en Brynhildur Vala, besti leikmaður vallarins í fyrri hálfleik, hreinsar.

Það er að færast aðeins meiri harka í þetta. Hallgerður togar Nadíu niður við miðlínu. Víkingar fá aukaspyrnu sem Telma Sif tekur en há sending hennar inná teig endar í höndunum á Amber.

Vel varið hjá Höllu Margréti!

Það losnar um Murielle rétt utan vítateigs Víkings og hún á fast skot að marki sem Halla gerir vel í að verja.

Murielle er einn besti leikmaður deildarinnar en hefur lítið komist áleiðis í dag.

Gengur betur næst.. Stólarnir dæmdar rangstæðar og Nadía ætlar að sparka boltanum til baka. Setur hann hinsvegar beint í andlitið á Brynhildi Völu liðsfélaga sínum. Hún virðist vera úr stáli og hlær bara. Ég hefði líklega farið grátandi útaf.

Fín sókn hjá Víkingum. Brynhildur Vala er yfirveguð á boltanum og á geggjaða sendingu upp til hægri á Dagný Rún. Hún kemur svo hættulegum bolta fyrir Tindastólsmarkið og mér sýnist það vera Nadía sem klárar sóknina á slöku skoti. Virkilega fín tilraun þarna en vantaði betra slútt.

"Áfram Hallgerður" heyrist úr stúkunni. Lánskonan úr Val á greinilega ungan stuðningsmann á vellinum í kvöld.

Flottur varnarleikur hjá Laufey sem vinnur boltann af Dagný Rún og finnur svo Murielle sem vinnur horn. Jacqueline tekur stutt á Laufey. Fær boltann aftur og reynir svo að snúa boltann í markið. Ekki nægur kraftur í skotinu og Halla Margrét ver þetta auðveldlega.

Hinu megin reynir Nadía svo bjartsýnisskot utan af velli en það er beint á Amber.

Og hvað gerist! Brynhildur Vala tekur laglega á móti boltanum og sendir Nadíu í gegn. Amber kemur vel út á móti, les Nadíu og ver frá henni! Geggjuð varsla hjá þessum öfluga markverði.

Þetta er eins og borðtennisleikur. Boltanum sparkað á milli liðanna. Nú kalla ég eftir því að leikmenn fari að taka boltann niður og láta hann ganga.

Fín skyndisókn hjá Víkingum og Nadía vinnur horn. Stefanía Ásta tekur hornið en setur boltann alltof utarlega í teiginn og Víkingar lenda í smá basli. Ná þó að koma í veg fyrir að gestirnir komist í skyndisókn.

Hætta í vítateig Víkinga. Jackie var tekin niður í miðjuhringnum og fékk aukaspyrnu. Setti boltann sjálf inná teig. Þar tók Murielle hann niður og lagði út á Aldísi Maríu sem reyndi að koma skoti á markið. Varnarmúr Víkinga hinsvegar öflugur og lokaði vel.

Stólarnir ívið sterkari þessar fyrstu tæpu 20 mínútur. Engin dauðafæri komin í þetta ennþá og bæði lið enn aðeins að basla við að halda í boltann.

Lið Tindastóls:

Amber

Kristrún - Bryndís - Hallgerður - Laufey

Hrafnhildur

María - Jacqueline

Hugrún - Murielle - Aldís María

Lið Víkings:

Halla

Freyja - Telma Sif - Margrét Eva - Svanhildur

Rut - Ólöf Hildur

Dagný Rún - Brynhildur - Stefanía Ásta

Nadía

Aftur fá Stólarnir aukaspyrnu úti hægra megin og sem fyrr er það Jackie sem tekur. Sendingin frá henni er of innarlega í þetta skiptið og Halla Margrét gerir vel í að stíga út og grípa fyrirgjöfina.

Þá er komið að fyrstu hornspyrnu leiksins. Jacqueline tekur hana fyrir gestina. Með sólina í augun setur hún boltann beint á kollinn á Bryndísi sem er búin að eigna sér markteiginn en hún skallar hátt yfir undir pressu.

Gaman að lauma því að að í dómaratríóinu er Bergrós Lilja Jónsdóttir, fyrrum leikmaður Þróttar. Frábært að sjá leikmenn reyna fyrir sér í dómgæslunni eftir að skórnir fara á hilluna.

Tindastóll fær aukaspyrnu úti hægra megin. Jacqueline tekur spyrnuna og setur háan bolta inná teig. Þar hefur fyrirliðinn Bryndís Rut best og vinnur skallann en hann er máttlaus og auðveldur viðureignar fyrir Höllu Margréti í markinu.

Fín sókn hjá gestunum. Murielle brýst upp vinstra megin og kemur boltanum á Jacqueline inná teig. Hún leggur hann út í skot á Maríu Dögg en hún hittir boltann ekki nógu vel og skýtur framhjá.