Þórsarar gera nokkrar breytingar á liði sínu frá tapinu gegn Vestra. Orri Sigurjónsson,Jóhann Helgi Hannesson og Izaro Abella Sanchez fara út fyrir þá Jakob Snæ Árnason, Jakob Franz Pálsson og Hermann Helga Rúnarsson. Þar af er Orri Sigurjóns ekki í hóp og líklegast frá vegna meiðsla.

Mikil gleðitíðindi fyrir Keflvíkinga að Frans Elvarsson og Kian Williams snúa aftur í lið þeirra eftir að hafa verið frá vegna meiðsla. Fyrirliðinn Magnús Þór Magnússon á enn eitthvað í land með að snúa aftur á völlinn og ég veit ekki með Adam Árna Róbertsson sem var fjarverandi gegn Grindavík og aftur í dag.

Keflavík

Keflavíkur liðið hefur verið jójó í upphafi móts. Stórum sigrum gegn Aftureldingu og Víking Ó var fylgt eftir með tapi gegn Leikni á heimavelli og 4-4 jafntefli við Grindavík í vægast sagt skemmtilegum leik þar sem 7 mörk voru skoruð í fyrri hálfleik.

Keflvíkingar sem spáð var velgengni fyrir mót og ætla sér að blanda sér í baráttuna um sæti i Pepsi Max deildinni þurfa því að finna meiri stöðugleika í leik sínum ef þau markmið eiga að nást.

Þór

Þór hefur byrjað mótið af krafti og aðeins 0-1 tap gegn Vestra á heimavelli skyggir á góða byrjun lærisveina Páls Viðars Gíslasonar. En það má alveg segja að tapið hafi verið óvænt og Þórsarar eflaust staðráðnir í að kvitta fyrir það á Nettóvellinum í dag.

Það má alveg kalla þetta stórleik en hér mætast liðin í 4. og 5.sæti deildarinnar og sigur í leiknum gerir mikið fyrir liðin sem ætla sér að gera sig gildandi í toppbaráttunni í sumar.

Góðan dag kæru lesendur og verið hjartanlega velkomin í beina textalýsingu Fótbolta.net frá leik Keflavíkur og Þórs 5.umferð Lengjudeildar karla.