Jóhannes Karl Guðjónsson stýrir ÍA ekki í leiknum í kvöld. Hvað veldur veit ég ekki.

Vekur athygli mína að Ísak Snær Þorvaldsson er í byrjunarliði ÍA. Kappinn sá er samningsbundinn Norwich en lék með ÍA á láni hluta af síðasta tímabili.

Hann sagði í viðtali við Fótbolta.net í vikunni að hann ætlaði sér að vera með ÍA fram í júní og reyna svo að koma sér á lán á Englandi.

Þar sem algjört áhorfendabann er enn í gildi er ekki hægt að skella sér á völlinn en það þýðir þó ekki að ekki sé hægt að horfa á leikinn. Stórsnillingarnir hjá Blikar TV eru að sjálfsögðu með leikinn í beinni og er hægt að sjá útsendingu þeirra á youtube.

ÍA

Skagamenn hafa bætt við sig tveimur leikmönnum að undanförnu, hinn eldsnöggi finnski bakvörður Elias Tamburini er komin til liðsins frá Grindavík. Þá hefur liðið fengið Hrafn Hallgrímsson til liðs við sig frá ÍR. Ég efast þó ekki um það að frekari frétta af leikmannamálum ÍA er að vænta fram að móti en stór skörð voru höggvin í hóp á síðastliðnu tímabili og að því loknu. Tryggvi Hrafn Haraldsson sem lánaður var til Lilleström í fyrra ákvað að ganga til liðs við Val, Bjarki Steinn Bjarkason var einn af upphafsmönnum íslendinganýlendunar í Venezia, Stefán Teitur Þórðarson fór til Silkeborg svo einhverjir séu nefndir.

Breiðablik

Blikar hófu að safna liði í raun strax síðasta sumar þegar tilkynnt var að Jason Daði Svanþórsson myndi ganga til liðs við þá frá Aftureldingu fyrir tímabilið. Þess utan hafa stór nöfn úr deildinni hér heima skipt yfir í Blika í vetur. Finnur Orri Margeirsson sneri heim í Kópavoginn eftir að hafa leikið með KR undanfarin ár pg á dögunum bárust þær fréttir að Breiðablik hefði keypt bakvörðinn Davíð Örn Atlason frá Víkingum.

Eftir því sem líða fer að móti fara leikmannahópar liðanna að taka á sig mynd. Bæði lið hafa verið að bæta við sig leikmönnum að undanförnu og verður spennandi að sjá hvernig þeir leikmenn koma til með að aðlagasta nýjum liðum.

Leikur kvöldsins er repeat frá úrslitaleik mótsins í fyrra þar sem sömu lið mættust. Úrlit leiksins það árið urðu á þá leið að ÍA sigraði með 5 mörkum gegn tveimur. Tryggvi Hrafn Haraldsson fór hamförum í leiknum fyrir Skagamenn og skoraði þrennu en Marteinn Theodórsson og Steinar Þorsteinsson skoruðu hin tvö mörk Skagamanna. Gísli Eyjólfsson og Benedikt V. Waren gerðu mörk Blika sem spiluðu síðasta korterið tveimur færri eftir að Guðjón Pétur Lýðsson og Brynjólfur Willumsson fengu að líta rauða spjaldið. Fyrir áhugasama má nálgast frétt Fótbolta.net um leikinn HÉR

Gott kvöld kæru lesendur og verið hjartanlega velkomin í beina textalýsingu frá úrslitaleik Fóbolta.net Mótsins þar sem Breiðablik tekur á móti ÍA.