Byrjunarliðin klár og vallarstarfsmenn með Sævar Pétursson í broddi fylkingar drífa vatnsslöngurnar af vellinum. Þá er bara að koma leiknum af stað!

Goðsögn við hlið Hemma

Það hefur vakið athygli að Heimir Hallgrímsson, fyrrum landsliðsþjálfari, hefur verið á skýrslu undanfarna leiki hjá ÍBV. Hann hefur verið Hermanni Hreiðarssyni til halds og trausts og spurning hvort að tannlæknirinn brosmildi láti sjá sig á KA svæðinu.

,,Hann er klár í aðstoð. Hann er með sín endalausu ráð og veit ýmislegt. Hann hefur spilað leikinn og svo þjálfað í mörg ár á topp leveli. Það vita það allir að hann er með endalausan brunn af fótboltafjöri,'' sagði Hermann.

Andri Rúnar Bjarnason, framherji ÍBV, hafði ekkert nema góða hluti um innkomu Heimis að segja.

,,Hann hefur komið mjög vel inn í þetta. Það er geðveikt að fá svona reynslu og aðra sýn á þetta líka. Það er ekki hægt að segja nei þegar að svona liðsstyrkur býðst.''


Ekki amalegt að geta leitað til Heimis.

Hvað gera KA menn í glugganum?

Arnar Grétarsson, þjálfari KA, staðfesti við Fótbolta.net eftir jafnteflið gegn Val að bæði Sebastiaan Brebels og Oleksiy Bykov væru farnir frá félaginu. Arnar mun reyna að styrkja liðið í félagsskiptaglugganum.

,,Það eru tveir góðir leikmenn farnir, vonandi geta einhverjir komið í staðinn en við verðum bara að sjá. Við þurfum að finna einhverja sem geta hjálpað okkur. Það er ekki nóg að taka bara einhvern,'' sagði Arnar.


Úkraínumaðurinn Oleksiy Bykov er farinn frá KA.

Dalvíkingur í formi

Nökkvi Þeyr Þórisson hefur spilað glimrandi vel í liði KA manna á þessu tímabili og hefur nú þegar tvöfaldað markamet sitt í efstu deild karla. Dalvíkingurinn er kominn með 6 mörk og hefur verið mikill áhrifavaldur í leikjum KA.

Það verður fróðlegt að sjá hvort að hann haldi dampi og komi sér í tveggja stafa tölu, en það hefur hann einu sinni gert á ferlinum. Þá spilaði hann í 3. deildinni með Dalvík/Reyni.


Nökkvi Þeyr hefur spilað vel í sumar.

ÍBV

Ef að bið KA manna eftir sigri í Íslandsmótinu þykir erfið að þá er staða ÍBV óbærileg. Eyjamenn eru án sigurs eftir 11 leiki og sitja á botni deildarinnar með 5 stig. Lofandi frammistöður hafa þó litið dagsins ljós og þarf ekki að horfa lengra til baka en til síðasta deildarleiks.

Þar spilaði liðið gegn meistarakandídötum Breiðabliks og hefðu getað stolið sigrinum. Liðin þurfti þó að sættast á markalaust jafntefli, en úr svona leikjum er hægt að taka hjarta og Hermann Hreiðarsson mun stappa stálinu í sína menn.


Guðjón Orri Sigurjónsson átti afbragðsleik gegn Blikum.

KA

Heimamenn í KA hafa átt misjöfnu gengi að fagna að undanförnu. Liðið hefur ekki unnið leik í Íslandsmótinu síðan að Skagamönnum var skellt 0-3 á Akranesi, en sá leikur var spilaður þann 15. maí. Biðin er því orðin nokkuð löng eftir sigri í deildinni. Liðið sótti hart að Valsmönnum í síðasta deildarleik og hefði með smá heppni getað tryggt sér öll þrjú stigin þar. Liðið situr nú í 5. sæti deildarinnar með 18 stig eftir 11 leiki.

Í millitíðinni hefur liðið þó komið sér í 8-liða úrslit Mjólkurbikarsins þar sem að þeir mæta Ægismönnum á heimavelli.


Biðin eftir sigri í Bestu-deild er orðin nokkuð löng hjá heimamönnum. Þeir fögnuðu sigri gegn Fram í Mjólkurbikarnum fyrir tveimur vikum síðan.

Dómarinn

Þorvaldur Árnason mun sjá til þess að allt fari drengilega og fallega fram í dag. Aðstoðardómarar eru Jóhann Gunnar Guðmundsson og Andri Vigfússon. Varadómari er Sveinn Arnarsson og síðastur en alls ekki sístur er eftirlitsmaðurinn, Magnús Sigurður Sigurólason.

Leikbönn

Í liði ÍBV taka varnarmennirnir Felix Örn Friðriksson og Sigurður Arnar Magnússon út leikbönn vegna uppsafnaðra áminninga. Báðir hafa spilað hvern einasta leik til þessa á Íslandsmótinu, en verða því miður ekki með 100% mætingu.


Felix Örn er í banni í dag.

Góðan daginn! Hér fer fram textalýsing á leik KA og ÍBV í Bestu-deild karla. Leikurinn átti að hefjast kl. 14:00, en var frestað til kl. 16:00 og fer fram á Greifavellinum uppá KA svæði. Tafir á flugi ollu því að leiknum var frestað um tvær klukkustundir.