Ivan vallarstjóri Grindavíkur hefur ekki látið svekkelsi vikunar ergja sig um of í vikunni en Ivan sem er stuðningsmaður Rauðu Stjörnunar í Belgrad horfði á sína menn tapa á dramatískan hátt í umspili um sæti í riðlakeppni Meistaradeildarinnar í vikunni.

Hann hefur greinilega verið fljótur að skilja við þau úrslit farið í að hugsa um völlinn sem lítur glæsilega út hjá honum í dag.

Herrakvöld Vestra

Ég geri ráð fyrir því að Vestramenn ætli sér að vera fljótir að gera sig til og græja eftir leik og halda vestur á ný. Vestri heldur í kvöld Herrakvöld sem kunnir menn segja mér að sé með þeim glæsilegri sem haldin eru. Veislustjórn er í höndum Gumma Ben og öruggt að stuðið verður mikið. Þarf að gera mér ferð vestur eitthvað árið og skella mér.

Dómarar

Dómari leiksins er Guðmundur Páll Friðbertsson. Honum til aðstoðar eru þau Rúna Kristín Stefánsdóttir og Tomasz Piotr Zietal. Ólafur Ingi Guðmundsson er svo eftirlitsmaður KSÍ.

Fátt í boði annað en stolt og ögn betra sæti

Vestri getur hæst komist í 37 stig með sigri í öllum fjórum leikjunum sem eftir eru og á því afar fjarlægan og ósennilegan möguleika á því að fara upp í Bestu deildina, Grindavík getur mest náð 35 stigum og á því ekki tölfræðilegan möguleika á að ná 2.sæti deildarinnar.

Það er því leikið um fátt annað en stoltið í leik dagsins. Það eitt og sér er þó talsvert fyrir liðin þar sem að bæði lið stefna eflaust hærra að ári og vilja enda tímabilið á góðum nótum og freista þess að byggja ofan á það í vetur.

Grindavík

Grindavík er satt að segja á sama stað og Vestri með sitt lið og það umhverfi sem er í kringum það. Maður er ekki viss um hvort menn séu ósáttir við tímabilið og hafi stefnt mun hærra eða hvort menn líta á þetta sem hraðahindrun á vegferð til árangurs.

Heimavöllurinn hefur þó reynst liðinu vel þetta sumarið en alls hafa 17 af 23 stigum liðsins komið í hús á Grindavíkurvelli svo það má til sanns vegar færa að markmið Alfreðs þjálfara liðsins að gera heimavöllinn að vígi sé á ágætri leið.

Vestri

Ég verð að viðurkenna að ég hef lítið séð af liði Vestra þetta sumarið og hef því aðeins tölfræði liðsins til þess að meta það útfrá. Ekki það að mitt persónulega mat sé alltaf upp á marga fiska en það er oft ágætt að hafa þó allavega séð lið spila nokkra leiki áður en maður fer að gaspra um þau.

Ég velti þó fyrir mér hvaða augum menn á Ísafirði líta á tímabilið. Metnaðurinn er mikill hjá Vestramönnum og mikið hefur verið lagt í liðið. Horfa menn á tímabilið sem vonbrigði eða eitt skref til baka til uppbyggingar undir nýjum þjálfara? Liðið hefur verið sannkallað ólíkindatól í sumar og tapað gegn liðum á báðum endum deildarinnar en snúið svo dæminu við í næsta leik á eftir. Hvað sem því veldur getum við verið viss um að gæðin eru til staðar í leikmannahópi Vestra til þess að velgja öllum liðum í þessari deild undir uggum en ef menn gleyma að kveikja á þeim fyrir leik hefur sýnt sig að illa getur farið.

Heil og sæl kæru lesendur og verið hjartanlega velkomin líkt og alltaf í þessa beinu textalýsingu Fótbolta.net frá leik Grindavíkur og Vestra í 19.umferð Lengjudeildar karla.