Byrjunarliðin eru klár! Valsmenn gera fimm breytingar á liði sínu frá því í bikarleiknum gegn Grindavík en inn í liðið koma Hlynur Freyr Karlsson, Elfar Freyr Helgason, Kristinn Freyr Sigurðsson, Adam Ægir Pálsson og Andri Rúnar Bjarnason fyrir þá Birki Heimisson, Hauk Pál Sigurðsson, Guðmund Andra Tryggvason, Hólmar Örn Eyjólfsson og Aron Jóhannsson.

Gestirnir í Keflavík gera sömuleiðis tvær breytingar á sínu liði frá bikarleiknum gegn Stjörnunni en inn koma Ernir Bjarnason og Ásgeir Páll Magnússon fyrir Daníel Gylfason og Jordan Smylie.

Spámaður umferðarinnar Nú er röðin komin að Guðjóni Pétri Lýðssyni, leikmanni Grindavíkur. Hann á 226 leiki og 47 mörk í efstu deild með Breiðabliki, Stjörnunni, Val, ÍBV og Haukum.

Valur 5 - 1 Keflavík
Valur vinnur Keflavík 5-1 eftir að hafa fengið skell í vikunni þeir mæta særðir og Andri Rúnar setur í gírinn og skorar þrennu , Kiddi Freyr eitt og Haukur Páll neglir einu skallamarki eftir horn , Adam leggur upp 3 og Aron Jó 2.
Minn maður Ernir Bjarnason skorar svo eitt sárabótarmark í lokin.

Dómarateymið! Erlendur Eiríksson fær þarð verkefni að halda utan um flautuna hér í kvöld og honum til aðstoðar verða þau Eysteinn Hrafnkelsson og Rúna Kristín Stefánsdóttir.
Guðmundur Páll Friðbertsson er varadómari og Jón Sigurjónsson er eftirlitsmaður.

Innbyrðis viðureignir Félögin hafa mæst 126 sinnum í mótsleik á vegum KSÍ til þessa.
Valsmenn hafa sigrað 52(41%) viðreignir.
Keflavík hafa sigrað 43(34%) viðreignir.
Liðin hafa skilið jöfn í 31(25%) viðreign.

Valur Valsmenn hafa farið virkilega vel af stað og eru meðal skemmtilegri liða í þessari deild. Eftir tap í annari umferð hafa Valsmenn ekki litið um öxl og hafa unnið alla sína leiki til þessa í deildinni fyrir utan þennan eina leik í 2.umferð.
Valsmenn hafa skorað flest mörk allra liða fyrir 8.umferð og aðeins Víkingar fengið á sig færri mörk heldur en þeir.

Valsvélin hökktaði þó örlítið í vikunni þegar Grindvíkingar lúðruðu þeim út úr bikarnum með sannfærandi sigri sem verður að teljast vonbrigði á Hlíðarenda en þeir ætla væntanlega að svara fyrir þessar ófarir gegn grönnum Grindvíkinga hér.

Valsmenn hafa skorað 23 mörk í deildinni til þessa og þeir sem hafa séð um markaskorun liðsins eru:

Adam Ægir Pálsson - 5 Mörk
Tryggvi Hrafn Haraldsson - 4 Mörk
Andri Rúnar Bjarnason - 4 Mörk
Aron Jóhannsson - 3 Mörk
Guðmundur Andri Tryggvason - 2 Mörk
Sigurður Egill Lárusson - 1 Mark
Kristinn Freyr Sigurðsson - 1 Mark
Hlynur Freyr Karlsson - 1 Mark
Birkir Heimisson - 1 Mark

Keflavík Það hefur verið ákveðið svartnætti yfir Suðurnesjamönnum. Eftir flotta byrjun þar sem Keflvíkingar sóttu sigur í fyrstu umferð gegn Fylki og stig gegn KA í 3.umferð hafa þeir tapað síðustu 4 leikjum sínum og sogast neðar og neðar í töfluna.

Keflvíkingar heimsóttu þá Stjörnumenn í bikarnum í vikunni en var hent öfugum út þaðan svo það er hægt að segja að útlitið hafi oft verið bjartara suður með sjó.
Það má vissulega fylgja sögunni að Keflvíkingar hafa verið að glíma við mikil meiðsli og hópurinn þeirra ekki álitinn með þeim breiðari.

Keflvíkingar hafa skorað 5 mörk í deildinni til þessa og þeir sem hafa séð um markaskorun liðsins eru:

Sami Kamel - 2 Mörk
Viktor Andri Hafþórsson - 1 Mark
Marley Blair - 1 Mark
Dagur Ingi Valsson - 1 Mark

Staðan í deildinni fyrir 8.Umferð! Deildin hefur farið vel af stað og fyrir 8.umferð deildarinnar lítur staðan svona út

1.Víkingur R - 21 stig
2.Valur - 18 stig
3.Breiðablik - 15 stig
4.HK - 13 stig
5.KA - 11 stig
6.FH - 10 stig
---------------------
7.Fram - 8 stig
8.Stjarnan - 6 stig
9.Fylkir - 6 stig
10.ÍBV - 6 stig
11.Keflavík - 4 stig
12.KR - 4 stig

Heil og sæl lesendur góðir! Verið hjartanlega velkominn í þessa þráðbeinu textalýsingu frá Origo Vellinum þar sem Valsmenn taka á móti Keflavík í 8.umferð Bestu deildar karla.