HITI Á KLÚBBNUM Hiti á klúbbnum er komið á tóninn til að kveikja í öllu í Egilshöllinni fyrir þennan slag sem framundan er.

Mjölnismenn mættir! Mjölnismenn virðast vera vaknaðir eftir nokkra ára hvíld og eru þeir farnir að láta í sér heyra.

Ansi ánægjulegt að sjá. Fjölnismafían væntanlega rétt ókomin og virðist ekki bara stefna í baráttu inn á vellinum í kvöld heldur líka í stúkunni. Bara veisla!

Byrjunarliðin eru klár Þjálfarar liðanna hafa opinberað byrjunarlið sín og má sjá þau hér til hliðanna.



Fannar Daði Malmquist byrjar á bekknum hjá gestunum en kemur væntanlega við sögu hér í kvöld.

Horfðu á leikinn beint á Youtube

Fylgist með: Reynir Haraldsson (Fjölnir)

Reynir Haraldsson var maður leiksins í sigri Fjölnis á Selfossi í síðustu umferð Lengjudeildarinnar og var valinn í lið umferðarinnar.

Fylgist með: Ingimar Arnar Kristjánsson (Þór)

Ingimar Arnar Kristjánsson er gríðarlega efnilegur leikmaður Þórs í Lengjudeildinni en hann hefur fengið að spreyta sig í fjarveru Alexanders Márs Þorlákssonar í undanförnum leikjum.

Ingimar er framherji sem hefur komið við sögu í fimm leikjum á þessari leiktíð en hefur verið í byrjunarliðinu í síðustu tveimur leikjum gegn Leikni, hann skoraði eitt og lagði upp annað í 3-1 sigri Þórs á Leikni í Mjólkurbikarnum á dögunum.

Ingimar er nýorðinn 18 ára en hann kom einnig við sögu í þremur leikjum á síðustu leiktið. Þór hefur gefið mörgum ungum leikmönnum tækifæri undanfarin ár en Bjarni Guðjón Brynjólfsson er m.a. í u19 ára landsliðinu sem er á leið á EM.

Þorlákur Árnason þjálfari Þórs hrósaði ungu strákunum á hástert eftir sigur Þórs gegn Leikni í deildinni á dögunum.

„Þetta eru gríðarlega góð tíðindi fyrir okkur Þórsara. Hann er fæddur 2005 og við höfum komið upp gríðarlega mörgum strákum fæddum 2004, Kristófer [Kristjánsson], Bjarni [Guðjón Brynjólfsson] og Aron Ingi [Magnússon]. Svo kemur enn einn, á meðan við keyrum á þessari hugmyndafræði þá koma alltaf upp leikmenn, þeir fá að spila og á endanum verður þú nógu góður," sagði Láki.

Taplausir Fjölnismenn

Fjölnismenn eru með tvo sigra og eitt jafntefli í deildinni til þessa. Í síðustu umferð vann liðið útisigur gegn Selfossi. Grafarvogsliðið ætlar sér upp úr deildinni.

Væru til í að spila gegn Leikni í hverri viku

Þórsarar hafa unnið síðustu tvo leiki sína, báða gegn Leikni. Fyrst í Mjólkurbikarnum og síðan í deildinni um síðustu helgi. Þór er með tvo sigra og eitt tap í Lengjudeildinni en liðið vann Vestra í fyrstu umferð en tapaði svo gegn Aftureldingu.

Einn besti dómari landsins með flautuna

Dómari: Ívar Orri Kristjánsson Dómari
Aðstoðardómarar: Helgi Hrannar Briem og Guðni Freyr Ingvason.

Þegar kalt er í veðri og stormur úti er gott að eiga góða höll Velkomin í þráðbeina textalýsingu frá Egilshöllinni í Grafarvogi þar sem Fjölnir tekur á móti Þór í 4. umferð Lengjudeildar karla. Það má búast við hörkuleik!