Liðin hafa klárað sínar upphitanir og fólk er að koma sér fyrir í stúkunni. Þegar orðið þéttsetið Víkingsmegin en talsvert meira pláss hjá stuðningsmönnum þeirra bláu.

Órjúfanlegt samband

Auðvitað mættu þeir saman út að hita; Tiago og Fred. Afskaplega tengdir og eru að sparka bolta á milli.

Gulli Jóns mættur í Fossvoginn

Toppmaðurinn Gunnlaugur Jónsson er mættur í Víkina í viðtöl fyrir Stöð 2 Sport. Það er ólíklegt að það verði sami hasar og þegar hann tók viðtölin í Kópavogi á dögunum. Gulli Jóns spáir 5-2 sigri Víkings í kvöld. Markaflóð framundan?

Valur að leika sér að HK Valur er að rúlla yfir HK og koma sér þar með upp í annað sætið, tveimur stigum á eftir Víkingi. Ef Víkingur vinnur í kvöld verður liðið því með fimm stiga forystu. Breiðablik gerði jafntefli við FH í Krikanum í gær eins og lesendur vita eflaust.

Fram með óbreytt lið

Jón Sveinsson teflir fram sama byrjunarliði og vann Keflavík 4-1 í síðasta leik.

Gunnar Vatnhamar kemur inn

Arnar Gunnlaugsson þjálfari Víkings gerir eina breytingu á byrjunarliðinu ef við miðum við þennan rosalega 2-2 leik gegn Breiðabliki. Færeyski landsliðsmaðurinn Gunnar Vatnhamar hefur jafnað sig af meiðslum og kemur inn í byrjunarliðið í stað Loga.

Þá er U19 landsliðsmaðurinn Gísli Gottskálk Þórðarson mættur aftur eftir meiðsli og er meðal varamanna hjá Víkingi.

Arnar fékk ekki bann

Síðasti deildarleikur Víkinga var hreint kyngimagnaður. Breiðablik jafnaði með tveimur mörkum í uppbótartíma og 2-2 urðu lokatölur. Eftir leikinn lét Arnar Gunnlaugsson dómarann Ívar Orra Kristjánsson heyra það. Einhverjir kölluðu eftir banni á Arnar eftir viðtalið en hann slapp við bann og verður á hliðarlínunni í kvöld.

Síðasti leikur Víkings var hinsvegar bikarleikur þar sem liðið vann 2-1 útisigur gegn Þór á Akureyri. Ari Sigurpálsson skoraði sigurmarkið í þeim leik. Víkingur mun mæta KR í undanúrslitum Mjólkurbikarsins.

Galdrakallinn og töframaðurinn

Leikmaðurinn sem stuðningsmenn Fram binda vonir við að galdri eitthvað fram í kvöld er Brasilíumaðurinn Fred. Hann var valinn leikmaður 10. umferðar en Fram rúllaði þá yfir Keflavík 4-1. Hann og vinur hans Tiago léku listir sínar.

„Ég og Tiago höfum þekkst í fimm ár og hann er einn af mínum bestu vinum. Við náum virkilega vel saman og segjum bara nokkur orð á portúgölsku og þá kemur eitthvað. Hann er töframaður og ég fékk góða sendingu frá honum í síðasta markinu og þá á ég bara að skora."

En eru þeir þá tveir töframennirnir á vellinum? „Einn galdrakall og einn töframaður," sagði Fred og hló í viðtali eftir síðasta leik.

Gaupi spáir öruggum sigri Víkings 3-0

Guðjón Guðmundsson:
Þetta er öruggur Víkingssigur. Víkingar hafa verið með besta liðið í sumar og það er hvergi veikan hlekk að finna. Nikolaj Hansen hefur verið sjóðandi heitur og Færeyingurinn, Gunnar Vatnhamar, það vatnar nú ekki mikið undan honum... frábær félagaskipti og bestu kaup sumarsins. Hann hefur verið gríðarlegur styrkur fyrir Víkinga og það er nánast útilokað að það gerist eitthvað annað en að Víkingur vinni þægilegan sigur á heimavelli hamingjunnar. Þeir fara hamingjusamir heim eftir 3-0 sigur.

Dómari: Jóhann Ingi Jónsson

Aðstoðardómarar: Rúna Kristín Stefánsdóttir og Ragnar Þór Bender. Varadómari: Guðmundur Páll Friðbertsson.

Hér urðu Framarar Reykjavíkurmeistarar Liðin áttust við hér á þessum velli á undirbúningstímabilinu, í úrslitaleik Reykjavíkurmótsins í byrjun febrúar. Þar unnu Framarar endurkomusigur í fimm marka leik.

Víkingur R. 1 - 4 Fram
1-0 Danijel Dejan Djuric ('9 )
1-1 Magnús Þórðarson ('50 )
1-2 Magnús Þórðarson ('56 )
1-3 Tryggvi Snær Geirsson ('90 )
1-4 Aron Snær Ingason ('90 )
Rautt spjald: Karl Friðleifur Gunnarsson, Víkingur R. ('74)

Lestu um leikinn

Hamingjan, hún er hér!

Velkomin með okkur á heimavöll hamingjunnar í Fossvoginum þar sem topplið Víkings leikur gegn Fram, bláliðar eru rétt fyrir ofan fallsætin. Það er líf og fjör við grillin og ég trúi ekki öðru en að púbbtöskurnar vinsælu verði um alla stúku.